Жаңаөзенде мемлекеттік рәміздерді дәріптейтін танымдық лекция ұйымдастырылды

Жаңаөзен қаласында мемлекеттік рәміздердің құндылығын дәріптеуге бағытталған тағылымды шара өтті. Қоғамдық қор «Қазақстан экологиялық қоры» жүзеге асырып отырған «Qazaq Symbols: Кеше, Бүгін, Ертең» әлеуметтік жобасы аясында «Менің символдарым – менің мақтанышым» атты танымдық лекция Маңғыстау облыстық медициналық колледжінде ұйымдастырылды, – деп хабарлайды Aikyn.kz.

Жоба «Мемлекеттік рәміздерді насихаттау және олардың маңызын түсіндіру» басым бағыты бойынша жүзеге асуда. Іс-шара Жаңаөзен қаласы әкімдігінің қаржыландыруымен, сондай-ақ Маңғыстау облыстық Білім басқармасы, оқу-әдістемелік бөлімінің қолдауымен өтті. 

Лекцияның негізгі мақсаты – жас ұрпаққа Қазақстан Республикасының Туы, Елтаңбасы және Әнұранының терең мағынасын ұғындыру, олардың әрбір элементінде жатқан тарихи тамыр мен рухани мазмұнды түсіндіру.

Шараға 50-ге жуық студент қатысып, өз ой-пікірлерімен бөлісті. Жастар мемлекеттік рәміздер туралы викторина сұрақтарына жауап беріп, елдік сана мен патриотизм төңірегінде пікір алмасты. Лекция барысында еліміздің рәміздері туралы бейнероликтер көрсетіліп, қатысушыларға арнайы ақпараттық материалдар таратылды. 

Колледж студенттері бұл кездесудің тәрбиелік мәні зор екенін атап өтіп, мұндай шаралар жастардың өз еліне деген сүйіспеншілігін арттыра түсетінін айтты.

Мемлекеттік рәміздердің мәні – елдің еңсесін көтеріп, халықтың рухын биіктету. Туымыз желбіреген сайын, Елтаңбамыз жарқыраған сайын, Әнұранымыз шырқалған сайын – әрбір қазақстандық өз жүрегінде мақтаныш пен бірлік сезімін сезінеді. Сондықтан мұндай жобалар – тек тәрбиелік іс-шара емес, ұлттық рух пен елдік сананы күшейтудің нақты тетігі.

Жоба аясындағы іс-шаралар кеңінен өріс алды. «Qazaq Symbols: Кеше, Бүгін, Ертең» әлеуметтік жобасы тек бір лекциямен шектеліп қалған жоқ. Қоғамдық қор «Қазақстан экологиялық қор» ұйымдастыруымен және Маңғыстау облыстық Білім басқармасы мен оқу-әдістемелік бөлімінің қолдауымен, өңірдегі мектептер мен колледждерде мемлекеттік рәміздердің мәні мен маңызын насихаттауға бағытталған бірқатар ауқымды іс-шаралар өткізілді.

Атап айтқанда, интерактивті сабақтар, ашық дәрістер, көрмелер, конференциялар, патриоттық челлендждер мен викториналар ұйымдастырылды. Оқушылар мен студенттер эссе жазу, сурет салу және шығармашылық байқауларға қатысып, өз елінің рәміздеріне деген сүйіспеншілігін өнер мен сөз арқылы жеткізді.

Сонымен қатар жобаның маңызды бағыттарының бірі ретінде мемлекеттік және квазимемлекеттік ұйымдардың қызметкерлеріне арналған тренингтер, мастер-кластар мен практикалық семинарлар өткізілді. Бұл іс-шаралардың мақсаты – мемлекеттік рәміздерді құрметтеу мәдениетін қалыптастыру, ұжымдық рухты нығайту және патриоттық идеологияны кеңінен тарату.

Семинарлар барысында қатысушылар Қазақстанның мемлекеттік рәміздерінің тарихы, авторлары мен олардың символдық мазмұны туралы терең мәлімет алып, тәжірибелік талқылаулар жүргізді. Қатысушылар өз ойларымен бөлісіп, рәміздерді қоғамда насихаттаудың жаңа тәсілдері туралы ұсыныстар айтты.

Жоба аясындағы осындай кешенді іс-шаралар Маңғыстау облысы мен Жаңаөзен қаласының білім беру ұйымдарында, мәдени мекемелерінде және еңбек ұжымдарында кеңінен жүзеге асуда. Ұйымдастырушылардың айтуынша, бастама алдағы уақытта да жалғасын тауып, өңірдің басқа да елді мекендерін қамтитын болады.

Мемлекеттік рәміздерді құрметтеу – тәуелсіз елдің әр азаматының борышы. Сол себепті «Qazaq Symbols: Кеше, Бүгін, Ертең» жобасы ел рухын көтеріп, жастар мен қоғам арасында патриоттық сана мен ұлттық бірегейлікті қалыптастыруға зор үлес қосып келеді.