Жаңаөзендегі қанды оқиға: 29 жастағы дәрігерді белгісіз ер адам бірнеше жерден пышақтап кетті

Маңғыстау облысының Жаңаөзен қаласында аурухана ішінде болған қайғылы оқиғаға қатысты нақты мәліметтер белгілі болды, – деп хабарлайды Aikyn.kz сайты. 

29 жастағы терапевт-дәрігер Нұрдәулет Аманғалиев пышақ жарақатынан қаза тапты.

Куәгерлер мен медицина қызметкерлерінің айтуынша, белгісіз ер адам медициналық мекеменің дәлізінде дәрігерге суық қарумен шабуыл жасаған. Марқұм ауыр халде баспалдақ маңынан табылған.

Сот-медициналық сараптама деректеріне сәйкес, дәрігердің денесінің бірнеше бөлігінен пышақ жарақаттары анықталған. Алған жарақаттары салдарынан ол көп қан жоғалтқан. Әріптестері шұғыл түрде медициналық көмек көрсетуге және операция жасауға тырысқанымен, дәрігердің өмірін сақтап қалу мүмкін болмаған.

Алдын ала мәліметтер бойынша, қылмыс марқұмның кәсіби қызметіне байланысты емес. Жақындарының айтуынша, күдіктінің жұбайы осы ауруханада медбике болып жұмыс істейді. Оқиғаға тұрмыстық сипаттағы жанжал мен қызғаныш себеп болуы мүмкін.

Марқұмның туыстары әділ тергеу мен заң аясында қатаң жаза тағайындауды талап ететінін мәлімдеді. Қаза болған дәрігердің анасы да болған жағдайға байланысты өз ұстанымын білдірді.

Қазіргі уақытта аталған дерек бойынша қылмыстық іс қозғалып, тергеу амалдары жүргізіліп жатыр. Күдікті қылмыстан кейін полицияға өз еркімен берілген.