Жақыныңызды “жедел жәрдеммен” алып кетті қазақстандықтарға SMS арқылы хабарлана бастайды

eGov.kz порталы мен eGov Mobile қосымшасында адам өзі хабарласа алмайтын жағдайда жақындарына оның шұғыл ауруханаға жатқызылғаны туралы хабарлайтын сервис іске қосылды. Пайдаланушы алдын ала үш сенімді тұлғаға дейін көрсете алады. Ауруханаға жатқызу тіркелген соң оларға автоматты түрде SMS жіберіледі.

Жаңа сервис қалай жұмыс істейтінін және жақындары нақты қандай мәліметтер алатынын Tengri Health тілшісі анықтады.

Туыстары ауруханаға жатқызу туралы қалай біле алады?

Сервисті пайдалану үшін қолданушы eGov.kz порталында немесе eGov Mobile қосымшасында сенімді контактілерді тіркеуі қажет. Үш адамға дейін көрсетуге болады, деп хабарлады Денсаулық сақтау министрлігінің баспасөз қызметі.

eGov.kz порталында сенімді контактіні қалай тіркеуге болады

eGov.kz порталында авторизациядан өту. Одан кейін "Ауруханаға жатқызылған жағдайда хабарлау үшін сенімді байланыс тұлғаларын тіркеу" қызметін таңдау керек. Содан соң сенімді тұлғаның ЖСН-ін көрсету қажет. Ол 18 жастан асқан және мобильді азаматтар базасында тіркелген болуы тиіс. Бұдан кейін дербес деректерді өңдеуге және денсаулық жағдайы туралы мәліметтерді беруге келісімді растап, сұранысты жіберу керек.

"Көрсетілген адамға тіркеуді растау немесе одан бас тарту туралы ұсыныспен SMS келеді. Растау үшін 911 кодымен, бас тарту үшін 912 кодымен жауапты SMS жіберу қажет. Шешім қабылдауға бес сағатқа дейін уақыт беріледі", - делінген хабарламада.

Егер адам тіркеуді растаса, пайдаланушы сұранысқа қол қояды. Осыдан кейін сенімді тұлға туралы мәліметтер Денсаулық сақтау министрлігінің ақпараттық жүйесіне беріледі.

eGov Mobile қосымшасында контактіні қалай тіркеуге болады

Қосымшаның басты бетінде "Мемлекеттік қызметтер" бөлімін таңдау қажет. Содан кейін "Денсаулық сақтау" бөліміне өтіп, "Ауруханаға жатқызылған жағдайда хабарлау үшін сенімді байланыс тұлғаларын тіркеу" қызметін табу керек. Одан әрі тіркеу процедурасын порталдағыдай ретпен орындау қажет.

Өтінімді Денсаулық сақтау министрлігінің ақпараттық жүйесімен өңдеу 10 минутқа дейін уақыт алады.

Ауруханаға жатқызу туралы SMS қашан келеді?

Денсаулық сақтау министрлігі Электрондық денсаулық сақтауды дамыту департаменті директорының орынбасары Айдар Қасенов хабарлама медицина қызметкері пациенттің ауруханаға жатқызылғаны туралы ақпаратты тіркегеннен кейін автоматты түрде жіберілетінін түсіндірді.

Жақын адамға SMS 1414 нөмірінен келеді. Хабарламада адамның ауруханаға жатқызылғаны, сондай-ақ медициналық ұйымның атауы мен мекенжайы көрсетіледі.

Осылайша, туыстарына пациенттің өзі хабарласқанын күтудің қажеті болмайды. Олар оның қай медициналық мекемеге жеткізілгенін біліп, қажет болған жағдайда өзі немесе ауруханамен байланыса алады.

Егер пациент өзін таныстыра алмаса не істеу керек?

Айдар Қасенов адам ауруханаға құжатсыз жеткізілген немесе өзі туралы мәлімет бере алмайтын жағдайларға жеке тоқталды.

"Егер адам есімін айта алмайтын немесе өзі туралы мәлімет бере алмайтын жағдайда болса, дәрігерлер пациенттің кім екенін анықтау үшін полицияны тарта алады", - деді спикер.

Сенімді контактіні тіркегеннен кейін оның өзекті мәртебесін eGov.kz порталындағы "Менің профилім - Жеке кабинет" бөлімінен, ал eGov Mobile қосымшасында - "Хабарламалар - Жеке кабинет тарихы" бөлімінен тексеруге болады.

ЧИТАЙТЕ ТАКЖЕ

692 мың теңге айыппұл немесе қамауға алу: жалған медициналық анықтама сатып алудың қаупі қандай?

Инсульт алған пациент “басқа ауданнан“: ДСМ шұғыл көмек көрсету ережелерін түсіндірді

Google News арқылы жаңалықтарымызды қадағалаңыз

Жазылу

Қазақстан

Денсаулық

оқыс оқиға