“Жаяу жүргіншілер өте алмайды“: алматылықтар Сейфуллин көшесіндегі “қазу жұмыстарына“ шағымданды

Алматылықтар Абай мен Сейфуллин даңғылдары қиылысындағы тротуардың жағдайына шағымданды. Жөндеу жұмыстары басталуына байланысты бұл учаскеде жүру қиындаған. Әкімдік тұрғындардың шағымына жауап берді, деп хабарлайды Tengrinews.kz.

"Қарттар қалай жүреді": не болды?

Редакцияға Алматы тұрғыны хабарласты. Оның айтуынша, Абай мен Сейфуллин даңғылдары қиылысындағы әлеуметтік дәріхана маңында жаяу жүргіншілер жолы қазылып тасталған, бірақ адамдарға ыңғайлы өткел қарастырылмаған.

"Бәрін қазып тастады. Жаяу жүргіншілерге өту мүмкін емес деуге болады. Қарттар қалай жүреді? Арба сүйреген аналар ше?" – деді шағымданушы.

Tengrinews.kz оқырманының фотосы

Tengrinews.kz оқырманының фотосы

Tengrinews.kz тілшісі пікір алу үшін Алматының қоғамдық кеңістіктерді дамыту басқармасына жүгінді.

Басқарма бұл учаскеде ауқымды абаттандыру жұмыстары басталғанын хабарлады. Жоба Сейфуллин даңғылы бойымен Алдар Көсе көшесінен Төле би көшесіне дейінгі аумақты қамтиды. Жұмыс "қасбеттен қасбетке дейін" қағидаты бойынша жүргізіліп жатыр.

Тұрғындар шағымынан кейін басқарма мердігерден кемшіліктерді жоюды және жаяу жүргіншілер үшін қауіпсіз өткелді қамтамасыз етуді талап етті.

"Мердігер ұйымға тұрғындардың қауіпсіз әрі кедергісіз өтуі үшін қажетті айналма жолдарды ұйымдастыру, сондай-ақ тиісті қоршау мен нұсқағыштар орнату тапсырылды", – деп хабарлады басқарма.

Ведомство өкілдері мердігер бұл жұмысты қысқа мерзімде орындауы тиіс екенін айтты. Дегенмен, басқарма нақты мерзімін атамады.

Бұған дейін Алматы тұрғындары LRT желісі салынып жатқан Төле би көшесінің жағдайына шағымданған болатын. Жүргізушілердің айтуынша, жолдың тарылуына байланысты көлік жүретін бөлікте көптеген шұңқыр пайда болған. Полиция бұл учаскеге кім жауапты екенін және заңбұзушылықтар анықталғаннан кейін қандай шара қолданылатынын айтты.

Google News арқылы жаңалықтарымызды қадағалаңыз