Жетістіктер жылы: қазақстандық өнерпаздар өрге озды

2025 жыл отандық өнерпаздар үшін табысты аяқталды. Мысалы, Димаш Құдайберген Нью-Йорктегі Madison Square Garden сахнасын бағындырса, киногерлер мрлдтаған теңге табысқа кенелді. 

Жас өнерпаздар да құр қол емес. Белді халықаралық фестивальдерді жеңіп, қазақ өнерін әлемге паш етіп жүр. 

Бұл – Нью-Йортегі Madison Square Garden кешені. Әлемдегі ең әйгілі спорт һәм ән кештері осы жерде өтеді. Көптің қолы жете беремейтін беделді белесті биыл қазақ баласы бағындырды. Даңқты сахнада Димаш Құдайберген жеке концертін беріп, әлемнің түкпір-түкпірінен мыңдаған тыңдарман жинады. Сөзсіз, бұл – Қазақстанның ғана емес, тұтас жаһан музыкасындағы басты оқиғалардың бірі.

Жастар да жылды табысты түйіндеді. Ержан Максим Дубайда өткен халықаралық байқауда Гран-при иегері атанды. Дәл осындай мәртебеге түрлі сайыстарда Александр Лим, Алмагүл Батталиева және El Voice тобы бөленді. Ауылдан шыққан жеткіншек Мирас Нағашыбай «Витебск» байқауының жеңімпазы атанса, Жасмин Түзелова Ресейдегі «Голос. Дети» шоуының финалына дейін жетті. Биыл шығармашылық оқу орындарындағы студенттердің шамамен 15 пайызы байқау жеңімпазы атанған.

Қазақфильм де жаңа дәуірге қадам басқан сыңайлы. Студияның жаңғырған инфрақұрылымымен бірге картиналар сапасы да артты. Мысалы, Qaitadan фильмі 1 миллиард теңгеден астам қаржы жинады. Осылайша, мемлекет тарапынан салынған қаражатты толық ақтап, бес есе артық пайда тапты. «Капитан Байтасов» алғашқы екі аптада 190 миллион теңге жинаған. Биыл 10 ұлттық фильм кең прокатқа шығып, 16 жаңа фильм түсіріле басталды. 

Елде 8 мыңға жуық мәдениет ұйымы бар, онда 58 мыңнан астам маман қызмет етеді. Солардың жалақысы кейінгі үш жыл бойы үздіксіз өсіп отырды. Жетістікке жетелеген жемісті жұмыс жалғасады. Биыл өңірлерде 61 мәдени нысанның құрылысы аяқталып, 251 нысан жөнделіп жатыр.

Алдағы уақытта салаға жасанды интеллектіні енгізуге қатысты жаңа бастамалар қолға алынбақ. Қазір Қарахан, Айша бибі, Арыстанбаб, Қожа Ахмет Яссауи кесенелерінде, сондай-ақ көне Отырар қалашығында заманауи цифрлық жүйелерді орнату жұмыстары жүргізілуде. Архив құжаттары, музей қорлары мен коллекциялар цифрландырылып, мәдени мұраға онлайн қолжетімділік кеңейеді. 

Авторы: Бекзат Аманов