Жетісу облысы дала еңбеккерлері марапатталды

Жетісу облысы дәндік жүгері, майбұршақ және қант қызылшасын өсіру бойынша республикада алдыңғы орында. Аймақ шаруалары биыл екі миллион тоннадан астам ауыл шаруашылық өнімін өндірді. 

Төрт-түлікті түлетіп, қамбаны астыққа толтырған еңбеккерлер жылды қорытындылады. Ауыл шаруашылығы қызметкерлері күніне арналған салтанатты жиында 25 адам марапатталып, сый құрметке бөленді. 

Ел ырысын еселеуге үлес қосып жүрген жандардың бірі – Қанат Кенбаев. 30 жылдан бері шаруашылықпен айналысатын ол «Еңбек ардагері» төсбелгісімен марапатталды.

Қанат Кенбаев, «Еңбек Ардагері» төсбелгісінің иегері:

- Мен 95 жылдан бастап осы ауыл шаруашылығына шаруа қожалығын ашып жұмыс істеп жатырмыз. 30 жылдай жұмыс жасадық. Бүгінгі беріп жатқан медаль марапаты сол еңбегіміздің өтеуі деп білемін. 

Сонымен қатар дала еңбеккерлеріне Премьер-министрдің «Алғыс» хаты,   облыс әкімінің «Құрмет» грамотасы берілді. «Ауыл шаруашылығының үздігі» төсбелгілері табысталды. Ал 400 гектарды тамшылатып суару әдісімен игерген Қахарман Мағдықасымға жаңа трактор тарту етілді.

Қаһарман Мағдықасым, шаруашылық жетекшісі:

- Бұрындары біз жүгері еккенде 5-6 тонна болса, тамшылатып суарудың арқасында 10-15 тоннаға дейін, ал қант қызылшасынан 70-80 тоннаға дейін алуға болады. Бұрын ол жер сусыз, шөл жер болған. Осы тамшылатудың арқасында біз су үнемдеп осындай табысқа жеттік. 

Жетісу облысында 20 мыңға жуық шаруа қожалығы бар. Еңбеккерлерді қолдау үшін биыл мемлекеттен 61 млрд теңге бөлінген. Бес инвестициялық жоба жүзеге асып, саланың дамуына ықпал етті.

Бейбіт Исабаев, облыс әкімі:

- Ауыл шаруашылық өнімін өндіру өткен жылмен салыстырғанда 11 пайызға өсті. 90 млрд теңгені құрады. Экспортқа жыл басынан бері 73 мың тоннаға жуық өнім шықты. Азық түлік түрінің 14 түрінен облыс халқын толық қамтуға жеткіліктіміз. Бұл жетістікте өздеріңіздің табанды еңбектеріңіз бар. 

Салтанатты жиында «Ауыл шаруашылығы саласын тұрақты дамыту» деп аталатын  жаңа бағдарлама таныстырылды. Соған сәйкес келер жылдан бастап шаруаларға 12 бағыт бойынша субсидия беріледі. 

Авторлары: Шыңғыс Қалиден, Қуаныш Түргенбаев, Айгүл Ғазизулина