Жетісу облысында медициналық туризм дамып келеді

Сырқатына шипа іздеген жандар көбіне Талдықорғандағы кардиологиялық орталық пен  көпсалалы клиника көмегіне сенім артады. Себебі аталмыш мекеменің дәрігерлері бірлесіп, бір мезетте екі операцияны қатар жасайды. Білікті мамандар бұдан басқа да жаңа ем-дом тәсілдерін жұмыс тәжірибесіне енгізіп жатыр. 

Кардиология орталығында жылына үш мыңнан аса адам қаралады. Солардың қатарында өзге өңірден келген және шетел азаматтары да бар. 

Фрэнк Фониер, АҚШ азаматы:

- Екі апта бұрын достарыма келген едім. Сол кезде денсаулығымның нашарлағанын сездім. Орталық қыметкерлері маған кардиостимулятор қойып берді. Қазір тәуір болдым. Дәрігерлерге көп рақмет. 

Ал Мұхамбедия Ақышев Алматы тұрғыны. Оның отбасы мекеме қызметкерлерінің көмегіне осымен екінші рет жүгініп отыр.

 Мұхамбедия Ақышев, Алматы қаласының тұрғыны:

- Екі ай бұрын менің жұбайым Алматыда инфаркт алды. Республика бойынша операция жасай алатын дәрігерлерді іздедік. Талдықорған қаласыдағы Нұрсан Сейітұлы операция жасауға келіскен жалғыз дәрігер болды. Екі ай бұрын келіп, операция жасады. Құдайға шүкір әйелім аман есен. Енді менің де қан қысымым көтеріліп, ауруханаға түсіп қалғаннан кейін порталға тіркелу керек деді. Бір жағынан ұнады. Барсам, «сіз дәрігерді өзіңіз таңдай аласыз», - деді. Мен: «таңдайтын жалғыз ғана дәрігер - Нұрсан Сейітұлы Нұрашев», - дедім. 

Нұрсан Сұрашев - кардиологиялық орталықтың директоры. Ол: «науқастар саны жылдан жылға артып келеді», - дейді.

Нұрсан Сұрашев, кардиологиялық орталықтың директоры:

- Кардиология орталығынада осы тоғыз айдың ішінде үш мыңнан астам науқас емделді. Үш мыңнан астам науқастың ішінде 150 ден астамы басқа облыс басқа мемлекеттің тұрғындары. Көбіне Өзбекстан, Ресей, Қырғызстан және алыс шетелден келген азаматтар түседі. Біз бүгінгі күні қандай азамат қай жақтан келіп түссе де Америка болсын Еуропа болсын біз көмегімізді ұсынуға дайынбыз.

Облыстық көпсалалы клиника дәрігерлері биыл 250 шетел азаматын қабылдаған. Онкологиялық ауруға шалдыққан науқастарды емдейтін мекемеде былтыр эндоскопиялық орталық ашылды. Сол арқылы  білікті мамандар тартылып, емдеудің озық үлгісі қолданыла бастады.   

Нәзира Айтпаева, Шымкент қаласының тұрғыны:

-  Әріпжанов Давран Тұрсынкулович бұрын Шымкентте жұмыс істеген. Сол кісінің пациентімін. Ол кісі осы жаққа ауысып кеткеннен кейін осы жаққа келіп жүрмін. Өте білікті, өз ісінің маманы. Қазір портал бойынша әр пациент өзінің ұнатқан врачына бара алады. 

Клиника қызметкерлері жақында гипертермиялық хайпэк операциясын да жасай бастады. Жаңа тәсіл қатерлі ісік жасушаларын жоюға арналған.

Бауыржан Бертаев, көпсалалы клиника директорының орынбасары: 

- Мемлекет басшысының медициналық және жергілікті туризмды дамытуға қатысты тапсырмасы бар. Оның ішінде ҚР 2023-27 жылдарға аралығындағы онкологиялық сырқаттарға қарсы кешенді жоспарымыздың аясында біздің клиникамызда көптеген өзгерістер болды. Заманауи онкологиялық өзгерістің барлық түрлері лабараторлы, инструменталды тексерулер. Сонымен қатар жалпы емдеу түрлері. Химиотерапия, таргенттік терапия және хирургиялық емнің барлық түрі толыққанды жүргізіледі. 

Көпсалалы клиника қызметкерлері жылына жеті мың адамға әртүрлі көмек көрсетеді. Медициналық қызмет сапасын арттыру үшін 2027 жылы өңірде онкологиялық орталық салу жоспарланып отыр. 

Авторлары: Шыңғыс Қалиден Қуаныш Түргенбаев