Жетісу облысында қытайлық цемент зауытына 264 млн теңге айыппұл салынды

«Alacem» ЖШС лицензиялық аумақтан тыс жерде пайдалы қазбаларды заңсыз өндіргені үшін жауапкершілікке тартылды. Айыппұл сомасы 264 221 676 теңгені құрады, деп хабарлайды Arasha.kz. 

Кәсіпорын бірнеше жыл бұрын өңірдің құрылыс саласын дамыту аясында іске қосылған. Зауыт әктас өңдеп, цемент өндірумен айналысады. Бұған дейін жергілікті тұрғындар тарапынан кәсіпорын қызметіне қатысты бірнеше рет шағымдар түскен. Олар шаңның көптігіне, жолдардың бұзылуына және қоршаған ортаға әсеріне алаңдаушылық білдірген.

Жетісу облысы экология департаменті мен мамандандырылған табиғат қорғау прокуратурасының мәліметінше, компания 2022 жылдан бері лицензиясы бола тұра, әктас өндіру жұмыстарын рұқсат етілген учаскенің шегінен тыс, көршілес аумақтарда жүргізген.

Сараптама нәтижесінде заңсыз өндірілген шикізат көлемі 90 611 текше метр екені анықталған.

Сот қорғау тарапының дәлелдерін қабылдамады. Атап айтқанда, мердігер ұйым ұсынған материалдар қажетті сертификаттың болмауына және түсірілім форматының талаптарға сәйкес келмеуіне байланысты жарамсыз деп танылды. Сонымен қатар компания тарапынан дұрыс топографиялық деректер де ұсынылмаған.

Сот «Alacem» ЖШС-ін жер қойнауын пайдалану туралы заңнаманы бұзғаны үшін кінәлі деп танып, келтірілген залалдың 100 пайызы мөлшерінде айыппұл салды. Жеңілдететін мән-жайлар анықталмаған.

Егер белгіленген тәртіппен шағым жасалмаса, сот шешімі 30 күннен кейін заңды күшіне енеді.