Жетісу спортшыларының жетістігі

Жетісу облысында халықтың денсаулығын нығайту мен бұқаралық спортты дамыту бағытында жүйелі жұмыс атқарылып жатыр. Кейінгі үш жылда 32 жаңа спорт нысаны бой көтеріп, 3 орталыққа күрделі жөндеу жүргізілді. Биыл 1 мың адамға шаққанда спорт инфрақұрылымымен қамтылу деңгейін 66,8%-ға дейін жеткізу көзделіп отыр.

Суретті түсірген – Жеңіс Ысқабай

Облыс аумағында 35 спорт мекемесі жұмыс істейді. Со­ның ішінде балалар мен жас­өс­пірімдерге арналған 23 спорт мектебінде 57 спорт түрімен 21 мыңнан астам спортшы жат­тығады. Өңірде 59 аккредиттелген спорт федерациясы қызмет атқарады. Биыл жан басына шақ­қан спорттық тапсырыс арқылы 160 секция ашылып, онда 6 183 бала тұрақты түрде спортпен айналысып жүр. Денешынықтыру мен спортты жүйелі түрде серік еткен тұрғындардың саны бүгінде 292 мыңнан асты, бұл облыс халқының 42 пайызын құрайды.

Өңірде спорттық инфра­құрылымды одан әрі дамыту жоспары айқын. Атап айтқанда, 8 жаңа спорт нысанының құрылысына қаржы бөлініп, оның біреуі қазірдің өзінде пайдалануға берілді, қалған 7 нысан жыл соңына дейін толық аяқталады. 5 футбол алаңы­ның құрылысы қолға алынып, Кербұлақ, Панфилов, Сарқан аудандарындағы 3 нысан спорт­сүйер қауымның игілігіне берілді. Қаратал ауданының Кәлпе ауылында кәсіпкердің қолдауымен заманауи үстел теннисі кешені ашылды.

– Спортты жаппай насихаттау мен саламатты өмір салтын қалыптастыру бағытында өңірде ауқымды іс-шаралар өткізіліп келеді. Жыл басынан бері 4 600-ден астам бұқаралық спорттық шара ұйымдастырылып, оған 108 мыңнан астам адам қатыс­ты. Жетісу спортшыларының жетістіктері де қуантады. Осы жылы облыс спортшылары түрлі деңгейдегі жарыстарда 1 046 медаль жеңіп алды. Оның ішінде 387-сі – алтын, 319-ы – күміс, 340-ы – қола. Сондай-ақ 9 спортшы халықаралық дәрежедегі спорт шебері атанып, 57 спортшы спорт шебері нормативін орындады, – дейді облыстық дене шынықтыру және спорт басқармасының басшысы Ұлан Рысқұлов.

Жаңа нысандардың салынуы, спорттық секциялардың көбеюі, бұқаралық спорттың кең қанат жаюы – өңірдің саламат­ты қоғам құру жолындағы табан­ды еңбегінің айғағы. Талдықор­ған қаласында 1,8 млн долларға спорт кешені салынып жатыр. Нысанда көркем гимнастика, волейбол, баскетбол спортымен айналысатын жаттығу залдары бар. Құрылыс-монтаж жұмыстарына 977,3 млн теңге, техникалық қадағалауға 23,3 млн теңге, авторлық қадаға­лауға 4,5 млн теңге қаражат жұмсалады. Бұған қоса, өңірде 8 спорт нысанында құрылыс жұмысы жүріп жатыр.

Жаңа нысандардың ішін­де ерекше көзге түсетіні – Талды­қорған қаласындағы елімізде теңдесі жоқ заманауи волейбол орталығы. Мұнда «Жетісу» кәсіби волейбол клубының ерлер, әйел­дер, жастар командалары жат­тығады.

Инвесторлар қаржысына са­лынған үстел теннисі орталығы да халықаралық стандарттарға сай жабдықталған, ерекше қажет­тілігі бар спортшыларға бар­лық жағдай жасалған. Текелі қала­сында ашылған денешынық­тыру-сауықтыру ке­шені бүгінде қала тұрғындарының мақтанышына айналып отыр. Мұнда ауыр атлетика, бокс, баскетбол, дзюдо, садақ ату, каратэ сияқты спорт түрлерінен 500-ден астам жас спортшы дайындалады.

Биыл да облыста спорт ны­сан­дарын салуға айрықша назар аударылды. Алакөл ауда­нын­дағы Лепсі ауылында 160 орын­дық спорттық кешен мен жатақхананың, Қабанбай ауылында 80 орындық спорт кеше­нінің құрылысы жүріп жатыр. Алдағы уақытта Кербұлақ, Көксу, Қаратал аудандарының бірнеше ауылында да осындай спорт кешендерін салу жоспарланған.

Балалар мен жасөспірімдер спорты – өңір саясатының бас­ты бағыты. Кейінгі үш жылда облыста бокс пен дзюдодан олимпиадалық резерв мектептері, жоғары спорт шеберлігі мектептері, «Жетісу» волейбол, хоккей, ұлттық спорт түрлері клубтары ашылды. Қысқы спорт түрлерін дамыту мақсатында Талдықорғанда керлинг, шорт-трек, шайбалы хоккей секциялары жұмысын бастады. Сонымен қатар облыс әкімінің бастамасымен алғаш рет аула, мектеп командалары арасында футбол, волейбол, бас­кетболдан облыстық балалар турнирі өткізілді. Оған 560-тан астам команда қатысты. Бұл шара дәстүрге айналады. Жетісудағы жүйелі жұмыс өңір халқының спортқа деген қызығушылығын арттырып, саламатты өмір салтын қалыптастыруға тың серпін беріп отыр.

Жетісу облысы