Жетісу университетінің ғалымдары инклюзивті білім беру бойынша өткен алғашқы Дүниежүзілік конгреске қатысты

І. Жансүгіров атындағы Жетісу университетінің өкілдері 15–17 қазан аралығында Алматы қаласында өтіп жатқан инклюзивті білім беру жөніндегі алғашқы Дүниежүзілік — World Inclusion Congress (WIC 2025) конгресіне қатысты, - деп хабарлайды Aikyn.kz.

Ауқымды шараға әлемнің 51 елінен 1500-ден астам қатысушы — мемлекеттік құрылымдардың өкілдері, ғылыми қауымдастық мүшелері, халықаралық ұйымдар, педагогтер, сарапшылар және инклюзивті білім беру саласының көшбасшылары жиналды. Қазақстан атынан қатысушылардың ішінде білім беру саласындағы инклюзивті ортаны дамыту мәселелерін талқылауға елеулі үлес қосқан И. Жансүгіров атындағы Жетісу университетінің оқытушылары да бар.

Университет пен жалпы ел үшін зор мақтаныш тудырған жайт – дәл осы конгресте Жетісу университетінің профессоры, педагогика ғылымдарының докторы, профессор Зульфия Ахметвалиевна Мовкебаеваға жеке баяндама жасау сенімі артылды. І. Жансүгіров атындағы Жетісу университеті өкілінің баяндамасы басқа қазақстандық жоғары оқу орындарының арасынан алғаш болып ұсынылып, ғылыми сессияны ашты.

Профессор З.А. Мовкебаева Қазақстан Республикасының Ғылым және жоғары білім министрлігі Ғылым комитетінің бағдарламалық-нысаналы қаржыландыру «BR24993150 Шектеулі мүмкіндіктері бар оқушылардың бейіналды дайындығына психологиялық-педагогикалық қолдау көрсетуді ұйымдастыру» тақырыбы бойынша жүргізілген ғылыми зерттеу нәтижелерін және тәжірибелік қорытындыларын ұсынды. Оның «Мектептен мамандыққа: мүмкіндіктері шектеулі балаларға арналған бейіналды стратегиялар» атты баяндамасы қатысушылардың ерекше қызығушылығын тудырды.

І. Жансүгіров атындағы Жетісу университеті өкілдерінің мұндай ауқымды халықаралық іс-шараға қатысуы университеттің ғылыми беделін әлемдік деңгейде нығайтып қана қоймай, Қазақстанда инклюзивті білім беруді дамыту жолындағы маңызды қадам болды. Секциялар жұмысы мен ғылыми пікірталастар барысында тәжірибе алмасу, шетелдік әріптестермен кәсіби байланыстар орнату жаңа халықаралық серіктестіктерге және ғылыми жобаларға жол ашып, инклюзивті тәжірибелерді жетілдірудің жаңа бағыттарын айқындауға мүмкіндік береді.

Университет әкімшілігі: инклюзивті білім беру бойынша алғашқы Дүниежүзілік конгреске қатысу – ұжымның жүйелі еңбегінің, білім сапасының жоғары стандарттарына ұмтылысының және білім алудағы қолжетімділік пен теңдік идеяларына деген адал көзқарасының нәтижесі деп атап өтті.