Жетісудың 134 мыңнан астам тұрғыны газбен қамтылады

Аталған облыс аумағындағы «Талдықорған-Үшарал» жаңа магистральдық газ құбырының құрылысы аяқталды. Жоба Мемлекет басшысының тапсырмасы бойынша елдің газ инфрақұрылымын дамыту аясында «QazaqGaz» ұлттық компаниясымен жүзеге асты, деп хабарлайды Egemen.kz.

Фото: ortcom.kz

Бүгінде «Қапал», «Жансүгіров», «Сарқан», «Қойлық», «Қабанбай», «Үшарал» елді мекендерінде 6 автоматтандырылған газ тарату станциясының құрылысы толық аяқталды. Бұл газ құбыры 134 мыңнан астам тұрғыны бар 84 елді мекенін газдандырудың негізі болады. Тарату желілерінің құрылысын салуға арналған жобалық-сметалық құжаттама бойынша мемлекеттік сараптаманың оң қорытындысын алу күтіліп отыр. Желілерді тарту жұмысын Жетісу облысы әкімдігі атқарады.

Сондай-ақ, катарлық серіктестермен бірлесіп стратегиялық маңызы бар «Бейнеу-Бозой-Шымкент» газ құбырының екінші желісінің құрылысы жалғасып жатыр.

Энергетика министрлігінің мәліметінше биыл республика бойынша 81 жобаны іске асыру жоспарланып отыр. Нәтижесінде 94 елді мекеннің шамамен 300 мың тұрғыны табиғи газға қол жеткізеді. Осылайша, жыл қорытындысы бойынша Қазақстанның газдандыру деңгейі 63,8 пайызға жетеді.