Жолаушылар ұшағының бортында күтпеген себептен өрт шықты

China Eastern Airlines ұшағының бортында өрт шықты, оған алдын ала мәлімет бойынша, тұтанып кеткен пауэрбанк себеп болған. Оқиға лайнер қонғаннан кейін терминалға қарай бет алған тұста болды. Жолаушылар арасында дүрбелең туындағанына қарамастан, зардап шеккендер жоқ, деп хабарлайды Tengri Travel The Sun басылымына сілтеме жасап.

Ұшақ қонғаннан кейін жүк сөресінен өрт шықты

Өрт Ланьчжоудан Гуйянға бағыт алған China Eastern Airlines әуекомпаниясының MU2421 рейсінде болды. Airbus A320 әуежайға аман-есен қонып, оқиға кезінде терминалға баратын жолда тұрған.

Мәліметтерге сүйенсек, өрт жолаушылардың бірінің қол жүгіндегі пауэрбанк салынған жоғарғы жүк сөресінен басталған. Құрылғының өздігінен тұтанып кеткені айтылды.

Жарияланған кадрлардан қызметкердің жүк сөресін ашқан сәтінде ішінен жалын шыққанын көруге болады. Жолаушылар өрт ошағынан тезірек алыстауға тырысса, ата-аналардың бірі кішкентай баланы бірден қауіпсіз жерге алып кеткен.

Instagram-дағы бұл жарияланымды көру

AsiaOne (@asiaonecom) жарияланымы

Экипаж өрттің жайылуына жол бермеу үшін оны сөндіруге кірісіп, сонымен бірге жанып жатқан сөредегі заттарды сыртқа шығарған. Көп ұзамай ұшаққа әуежайдың өрт сөндіру қызметі жетіп, содан кейін ғана жолаушылар әуе кемесінен қауіпсіз шыға алды.

Aviation Safety Network ақпараты бойынша, жолаушылар мен экипаж мүшелерінен ешкім зардап шекпеген. Ұшақтың өзіне түтіннен ғана шамалы зақым келген.

Жолаушылардың бірі Jimu News басылымына берген сұхбатында алдымен салонның алдыңғы жағындағы адамдар өрт деп айқайлап, ұшақтың құйрық жағына қарай қаша бастағанын айтты.

"Мен ұшақтың сырты өртеніп жатыр деп ойладым, бірақ басымды көтергенде жоғарғы жүк сөресінен жалын шығып жатқанын көрдім", - деді ол.

Тағы бір жолаушы бортсеріктердің жағдайды тез бақылауға алғанын атап өтті.

"Экипаж бізден сабыр сақтауды өтініп, өртті тез әрі байыппен сөндірді. Бақытымызға орай, ұшақ қонып қойған еді - бұл шынымен де өте қорқынышты болды", - деді куәгер.

Пауэрбанктер неге ұшақта қауіпті болуы мүмкін?

Мамандар кез келген пауэрбанктің ішінде литий-ионды аккумуляторлар болатынын айтады. Техника ғылымдарының докторы Андрей Затонскийдің сөзінше, мұндай батареялар соққыға, қызып кетуге және ішкі зақымдануларға сезімтал келеді.

Бұл ретте құрылғы сырттай бүтін көрінгенімен, оның ішінде құлағаннан немесе қатты қызудан пайда болған жасырын ақаулар болуы мүмкін.

Пермь политехникалық университетінің сарапшылары ұшу кезінде электроника қысымның өзгеруіне, дірілге және температураның құбылуына байланысты қосымша жүктеме алатынын түсіндіреді. Егер аккумулятор зақымдалған болса, бұл факторлар "жылулық ұшып кету" (thermal runaway) деп аталатын процесті тудыруы мүмкін - бұл кезде батарея күрт қыза бастайды.

Осыдан кейін ішінде газ бөлініп, температура тез көтеріледі де, құрылғыда өрт шығып, тіпті жарылып кетуі мүмкін.

Сонымен қатар мамандар ұшу кезінде пауэрбанкті пайдалану аккумуляторға түсетін жүктемені арттыратынын ескертеді. Қуаттау кезінде батарея қосымша қызады, ал егер құрылғы салқындату мүмкіндігі жоқ сөмкеде, рюкзакта немесе орындық қалтасында болса, қызып кету қаупі артады.

Сарапшылардың айтуынша, смартфондармен салыстырғанда көптеген пауэрбанк, әсіресе бюджеттік модельдер, қорғаныс жүйесінің қарапайымдылығына байланысты зақымданулар мен артық жүктемелерге төзімсіздеу болады.

Мамандар сапар алдында құрылғының күйін тексеруді, зақымдалған немесе қызып кететін пауэрбанктерді қолданбауды және мүмкіндігінше ұшақта қажетсіз пайдаланбауды ұсынады.

Дүниежүзіндегі әуекомпаниялар ережелерді қатайтып жатыр

Осыған ұқсас оқиғалар жиілегеннен кейін, көптеген тасымалдаушы литий-ионды аккумуляторлары бар құрылғыларды тасымалдау ережелерін қайта қарай бастады.

Айта кетейік, осыған ұқсас оқиға өткен жылдың күзінде Ханчжоудан Сеулге (Инчхон) бағыт алған CA139 рейсінде болған еді. әуекомпания мәліметінше, жолаушылардың бірінің орындық үстіндегі жүк сөресіне қойған қол жүгіндегі литий батареясы өздігінен өртеніп кеткен. Экипаж өртті дер кезінде сөндірді. Бортта болғандардың ешқайсысы зардап шеккен жоқ.

Қараша айында бортта пауэрбанктерді пайдалануға Azerbaijan Airlines тыйым салса, 2025 жылдың қазан айында осындай шектеулерді Emirates енгізді.

2025 жылғы 13 наурыздан бастап Air Astana мен FlyArystan да литий батареяларын тасымалдау талаптарын қатайтты. Қосалқы аккумуляторларды, соның ішінде пауэрбанктерді тек қол жүгімен тасымалдауға рұқсат етіледі.

Бұдан бөлек, FlyArystan 7 мамырдан бастап мұндай құрылғыларды тасымалдау ережелерін жаңартты:

қуаты 100 ватт-сағатқа дейінгі пауэрбанктерді шектеусіз тасымалдауға болады; қуаты 100-ден 160 ватт-сағатқа дейінгі құрылғыларға тек әуекомпанияның келісімінен кейін ғана рұқсат беріледі; 160 ватт-сағаттан асатын пауэрбанктерді тасымалдауға толықтай тыйым салынған.

Бұл ретте пауэрбанктерді тіркелген багажға тапсыруға болмайды, ал ұшу кезінде оларды пайдалануға және олардан құрылғыларды қуаттауға бұрынғыша тыйым салынады.

Шектеулерге сымсыз құлаққаптар да ілікті.

Талаптардың күшейтілуі біртіндеп литий-ионды аккумуляторлары бар басқа да құрылғыларға таралып жатыр.

Мәселен, Тайваньның EVA Air, UNI Air және Tigerair әуекомпаниялары сымсыз құлаққаптарды тіркелген багажға тапсыруға тыйым салды, соның ішінде Apple AirPods та бар. Себебі сол: қуаттау кейсінде литий-ионды аккумулятор бар және ол іс жүзінде пауэрбанктің бір түрі болып саналады.

"Ұшу қауіпсіздігін қамтамасыз ету мақсатында құлаққап кейстері мен кіріктірілген литий-ионды аккумуляторлары бар портативті желдеткіштер сияқты электронды құрылғыларды бортқа тек қол жүгімен алуға болады", - деп түсіндірді Tigerair өкілі.

UNI Air өкілдері де Bluetooth құлаққаптары қуаттау кейсімен бірге портативті электронды құрылғыларға жататынын және қауіпсіздік мақсатында тіркелген багажда болмауы тиіс екенін атап өтті.

Осындай талаптар Жаңа Зеландияның авиациялық билік орындарының ережелерінде де бар, онда сымсыз құлаққаптарға арналған қуаттау кейсі де пауэрбанктің бір түрі ретінде қарастырылады.

Осылайша, литий-ионды батареялары бар құрылғыларды тасымалдау ережелерін қатаңдату үрдісі жалғасып жатыр. Мұндай шектеулердің негізгі мақсаты - борттағы өрт қаупін азайту және экипаждың ықтимал өрт ошағын жылдам анықтап, жоюына мүмкіндік беру.

Тағы оқыңыз: Теңізді ерекше жүкпен кесіп өткен екі дос желі жұлдызына айналды

Google News арқылы жаңалықтарымызды қадағалаңыз

Жазылу