Жұмысшы жастар аманаты форумы өтті

Мұндағы мақсат – жұмысшы маман­дықтардың қоғамдағы беделін арттыру, жастардың техникалық және өндірістік салаларға деген қызығушылығын ояту.

Өз кезегінде, «AMANAT» партиясы Жетісу облыстық филиалының төрағасы Арыстанғали Арын Мемлекет басшысының бастамасы аясында қолға алынған жобалар жастар үшін аса маңызды екенін атап өтті.

«Еліміздің болашағы – еңбектің қаді­рін білетін, кәсібіне адал жастардың қо­лын­да. Жұмысшы мамандықтардың мәр­­тебе­сін арттыру тек экономикалық мін­дет емес, бұл – қоғамның рухани жа­уап­керші­лігі. Біз жастарға тек қолдау ­көр­­сетіп қана қоймай, олардың еңбек ада­­мын үлгі тұтуына жағдай жасаймыз», – деді ол.

Іс-шара барысында Жетісу облыстық ардагерлер кеңесінің төрағасы Ермек Келемсейт жастарды еңбекке деген адалдық пен табандылыққа үндеп, аға буынның тәжірибесі мен еңбек мәдениеті жөнінде ой бөлісті. 

Форумның негізгі бөлімі жас маман­дардың тәжірибе бөлісуіне арналды. Мәселен, ауыл шаруашылығы саласында табысты еңбек етіп жүрген «Бақыт-Қаратал» ЖШС-ның басшысы Серікжан Жексембиев баяндама жасады. Ол аралас ауыл шаруашылығының мүмкіндіктері туралы айтып, ауыл жастарының кәсіпкерлікке бет бұруының маңызын атап өтті.

«Қай салада жұмыс істесең де, шын ниетпен, табандылықпен істесең, нәтиже бо­лады. Жастар өз мамандығын жетік мең­геріп, нағыз маман болуға ұмтылуы керек. Себебі ауыл – елдің тірегі, ал ауылды ал­ға сүйрейтін – еңбекқор жастар», – деді ол.

Сондай-ақ Ak Altyn Products бас дирек­торы Данияр Искаков, «АқсуҚант» зауы­тының зертхана меңгерушісі, «Үздік жас жұмысшы – 2025» көшбасшы Аруна Кенжеханова, KEGOC АҚ электромонтері Қуаныш Мұсабаев және техникалық колледж оқытушысы Айбек Иманжанов сөз сөйлеп, өз тәжірибелерін бөлісті.

Форум аясында өндіріс, ауыл шаруа­шылығы, энергетика, зертхана, ком­му­налдық және құрылыс салаларында үл­гі­лі қызмет атқарып жүрген бірқатар жұмыс­шы маманға «AMANAT» партиясы Жетісу облыстық филиалының Алғысха­ты табысталды. 

Елнар ЕЛТАЙ