Жыл басынан бері көтерме сауда 6,5% ға өсті

Қазақстанда 2026 жылдың алғашқы бес айында көтерме және бөлшек сауда көлемі айтарлықтай өсіп, жалпы айналым 28,6 трлн теңгеден асты.
Бұл ішкі нарықтағы іскерлік белсенділіктің артып, тұтынушылық сұраныстың сақталып отырғанын көрсетеді.

Ұлттық статистика деректеріне сәйкес, қаңтар-мамыр айларында сауда саласының нақты көлем индексі өткен жылдың сәйкес кезеңімен салыстырғанда 105,6 пайызды құрады.

Есепті кезеңде көтерме сауда көлемі 19,6 трлн теңгеге жетіп, бір жыл бұрынғы көрсеткіштен 6,5 пайызға артқан. Сарапшылар мұны өндірістік белсенділіктің жоғарылауымен, тауар айналымының ұлғаюымен және кәсіпкерлік сектордағы сұраныстың өсуімен байланыстырады.

Бөлшек сауда саласында да оң динамика байқалады. Жылдың алғашқы бес айында бөлшек сауда көлемі 9 трлн теңгені құрап, нақты мәнде 3,6 пайызға өскен. Бұл халықтың тұтыну белсенділігінің сақталып отырғанын аңғартады.

Өңірлер бөлінісінде сауда айналымының негізгі бөлігі ірі мегаполистер мен өндірістік аймақтарға тиесілі. Жалпы сауда көлемінің 34,5 пайызы Алматы қаласына тиесілі болса, Астана қаласының үлесі 13,9 пайызды құрады.

Үздік үштікті 11,5 пайыздық көрсеткішпен Атырау облысы түйіндеді. Мұнай-газ саласының жоғары белсенділігі өңірдегі сауда айналымының өсуіне ықпал етіп отыр.

Сондай-ақ сауда көлемі бойынша көшбасшы өңірлердің қатарында Қарағанды облысы мен Шымкент қаласы бар. Олардың жалпы айналымдағы үлесі тиісінше 6,1 және 5 пайызды құрайды.

Сыртқы сауда көрсеткіштері де өсім көрсетуде. Биылғы жылдың алғашқы төрт айында Қазақстанның сыртқы сауда айналымы 7,9 пайызға артып, 45 млрд АҚШ долларына жеткен.

Мамандардың пікірінше, ішкі және сыртқы сауда көлемінің ұлғаюы экономиканың тұрақты дамып келе жатқанын көрсетеді. Бұл өз кезегінде кәсіпкерліктің дамуына, жаңа жұмыс орындарының құрылуына және бюджет кірістерінің артуына оң әсер етеді.