Жыл сайын ел экономикасы бес пайызға өседі

Енді ел экономикасы жыл сайын өседі. Яғни әлеуметтік-экономикалық болжамға сәйкес, алдағы үш жылда ол бес пайыздан жоғары болады. Сала мамандарының айтуынша, жалпы ішкі өнімнің өсуі мен халықтың табысын арттыру, сондай-ақ инфляцияны төмендету — межеге жетудің кепілі болмақ. 

Ел экономикасы мұнай мен шикізат есебінен емес, ішкі өндіріс пен инвестицияның арқасында қалыптасады. Үкімет мүшелері осылай дейді. Болжам бойынша өсім көлемі жыл сайын бес пайыздан жоғары болмақ. Әрі бұл көрсеткіш бұдан былай сыртқы факторларға емес, ішкі мүмкіндіктерге тәуелді. Яғни алдымен инвестиция мен өндіріс әлеуетін арттыруға басымдық беріледі. 

Серік Жұманғарин, ҚР Премьер-Министрінің орынбасары, Ұлттық экономика министрі:

- Бюджетке байланысты биыл енгізілген салық және бюджеттік реформаға байланысты. Ол халықтың табысын көтеруге әсер етеді. Себебі Үкіметтің кірістері көбейеді. Екіншіден, жеке секторларға әсер етеді. Себебі инвестиция салу, нарықты дамыту, ол жаңа битзнестің түрлерін дамыту. Санын, сапасын және олардың мүмкіншілігін көтеру. 

Жаңа болжамда, мемлекет қаржысын басқарудың тәсілі өзгереді. Оған сәйкес, алдағы үш жылда мемлекет қарызын жалпы ішкі өнімнің 19 пайызына дейін қысқарту көзделген. Сондай-ақ бағаны тұрақтандыру мен табыстың сақталуын қамтамасыз ету   экономиканың сапалы дамуының кепілі болып қала бермек. 

Серік Жұманғарин, ҚР Премьер-Министрінің орынбасары, Ұлттық экономика министрі:

- Қазір әлеуметтік маңызы бар тауарлар қатты өспейді. Тіпті өткен айда тұрақты болды. Қазіргі уақытта екі аптаның ішінде өсім —  0,1 пайыз. Ол көп емес, былтырғыдан қарағанда төмен. Бағасы өсетін қияр, қызанақ бар. Олар әлеуметтік маңызы бар тауарлар тізіміне кірмейді. Сол себепті қазір дұрыстап талдау жасап, ертең керек болса, осы тізімге енгізу туралы тапсырма бердім.

Елдің әл-ауқатын арттыруға бағытталған жаңа бағдарламада ауыл-аймақты өркендетуге ден қойылған. Оған сәйкес алдағы үш жылда өңірлердің дамуына 9 трлн теңгеден астам қаржы жұмсалады. Мамандардың айтуынша, бұл өз кезегінде, жаңа жобалардың жүзеге асып, инфрақұрылымды реттеуге, сондай-ақ елді мекендерде тұрғын үй құрылысын жандандыруға ықпал етеді.  

Авторы: Назерке Тоқжан