Қазақстанда зейнетақы 5 пайызға өседі

АЛМАТЫ, 6 қаңтар – Sputnik. 2026 жылғы 1 қаңтардан бастап Бірыңғай жинақтаушы зейнетақы қорынан төленетін зейнетақы төлемдері 5 пайызға ұлғаяды, деп хабарлайды "БЖЗҚ" акционерлік қоғамы.

Бұл зейнетақы төлемдерін бұрыннан алып жүрген зейнеткерлерге қатысты.

Зейнетақыны алғаш рет ала бастайтын азаматтар үшін ай сайынғы төлем мынадай тәртіппен есептеледі:

"Зейнетақы жинағының сомасы зейнетақы төлеу мөлшерлемесі — 6,5 пайызға көбейтіліп, 12 айға бөлінеді. Кейінгі жылдары ай сайынғы төлем мөлшері зейнетақы төлемін индекстеу мөлшерлемесіне сәйкес 5 пайызға арттырылады", - дейді зейнетақы қоры.

БЖЗҚ-дан берілетін ай сайынғы зейнетақы төлемінің ең төменгі мөлшері ең төменгі күнкөріс деңгейінің кемінде 70 пайызына тең.

2026 жылғы ең төменгі күнкөріс деңгейі - 50 851 теңге. Ал ай сайынғы зейнетақы төлемінің ең жоғары мөлшері шектелмейді және ол алушының зейнетақы жинағының көлеміне тікелей байланысты.