Жылу энергия мекемесінің қарызы қордаланып қалған

Оралды жылумен қамтамасыз ететін «Жайықжылуқуат» мекемесінің табиғи газ үшін қарызы өсіп барады. Кәсіпорынның «Қазақгаз» компаниясына берешегі 1 млрд 700 млн теңгеге жеткен.

Оған электр орталығындағы қуаты 25 мегаваттық газотурбиналық агрегаттың істен шығуы және өндірілетін электр энергияның азайып кетуі себеп болған. Орталыққа барған сенатор Арман Өтеғұлов жөндеу жұмыстарымен танысты. Қондырғы қаңтар айының ортасында іске қосылады. Қазір турбинаның компрессор қалақшалары мен жану камералары алмастырылып жатыр. 

Жөндеуге қажетті 1,5  млрд теңге төтенше жағдайларға арналған облыстық резервтен бөлінді. Депутатпен кездесуде мекеме басшылығы өздерін алаңдатқан мәселелерді де ортаға салды. Соның бірі – стратегиялық маңызды кәсіпорынның жекешелендірілетін нысандар тізіміне енуі. «Сенатор жекенің меншігіне беру мәселесі жан-жақты талқылануы керек», - дейді.

Арман Өтеғұлов, ҚР Парламенті Сенатының депутаты:

- Осы мекемені ертең сатқанда тағдыры қалай болмақшы? Тариф өсіп кетпей ме, болмаса қызметі қандай деңгейде жұмыс жасайды? Бұл –үлкен сұрақ. Ол да ертең халықтың қалтасына барып соғатын нәрсе. Соны жан-жақты сөйлесіп барып, зерделеп барып, сосын барып жекешелендіруге жатқызу керек деген ойым бар.