Жылу желісін жаңартуға қаржы бөлінді

Фото: Ашық дереккөз

Бұл жоба Мемлекет басшысының Парламент палаталарының бірлескен отырысында жүктеген энергетикалық, инженерлік инфрақұрылымды жаңғырту жөніндегі тапсырмаларын орындау аясында жүзеге асырылады. Бөлінген қаражат Жамбыл Жабаев, Александр Шәжімбаев, Новая және Ыбырай Алтынсарин көшелері бойымен өтетін жылу магистралінің учаскелерін жаңартуға бағытталады.

Жоба аясында биыл ұзындығы 1,4 шақырым болатын ескі жылу желісі толықтай алынып, оның орнына жаңа құбырлар тартылады. Өткен жылы осы магистралдың 0,7 шақырымы жаңартылған болатын. Нәтижесінде, Петропавлдағы жалпы ұзындығы 2 шақырымнан асатын №2 жылу магистралін қайта жаңарту жұмысы толық аяқталады.

Жобаны іске асыру тозу деңгейі 80 пайыздан асқан жылу желілерін ауыстыруға мүмкіндік береді. Соның нәтижесінде 30 мыңнан астам тұрғын, 200-ден аса көппәтерлі тұрғын үй мен әлеуметтік нысан тұрақты жылумен қамтылып, қаладағы жылу желілерінің тозу деңгейі де төмендейді.

Үкімет алдағы жылыту маусымына дайындық жұмысын тұрақты бақылауда ұстап отыр. Энергетика министрлігінің мәліметінше, өткен жылдан бері еліміздегі электр стансаларында 10 энергия блогіне, 63 қазандыққа, 39 турбинаға күрделі жөндеу жүргізілген. Сонымен қатар 17 мың шақырым электр тарату желісі жаңартылып, 420 қосалқы станса жаңғыртылды. Ең көп тозған 323 шақырым жылу желісі де ауыстырылды.

Атқарылған жұмыстың нәтижесінде электр стансалары жабдықтарының тозу деңгейі
53 пайызға, ал жылу желілерінің тозуы 50 пайызға дейін төмендеді.