Қытай Еуропалық одақтан импортталатын етке бес жылдық баж салығын енгізді

Қытай билігі Еуропалық одақ елдерінен әкелінетін шошқа етіне қатысты антидемпингтік кедендік баж салығын енгізетінін мәлімдеді. Бұл туралы ҚХР Сауда министрлігі хабарлады. Жаңа тарифтер 4,9 пайыздан 19,8 пайызға дейінгі аралықта белгіленіп, алдағы сәрсенбіден бастап күшіне енеді және бес жыл бойы қолданыста болады, деп хабарлайды euronews сайты. 

Қытай тарапы бұл шешімді Еуроодақтан импортталатын шошқа еті мен одан жасалған өнімдер демпингтік бағамен жеткізіліп, отандық өндіріске елеулі зиян келтірді деген қорытындымен түсіндірді. Антидемпингтік тергеу 2024 жылдың маусым айында басталған болатын.

Сарапшылардың пікірінше, бұл қадам Пекин мен Брюссель арасындағы сауда қатынастарының шиеленісе түскенін аңғартады. Тергеу Еуропалық одақтың Қытайда өндірілген электр көліктеріне қосымша кедендік баж салығын енгізуге дайын екенін жариялағаннан кейін басталған.

Оқи отырыңыз: 2026 жылы жеткілікті шек мөлшері артады. Зейнетақы жинағын мерзімінен бұрын қалай алуға болады?

Жаңа баж салығы тек шошқа етіне ғана емес, жануар тектес қосалқы өнімдерге де әсер етеді. Атап айтқанда, Қытайда деликатес саналатын құлақ, тұмсық, аяқ және басқа да субөнімдерге тарифтер қолданылады. Бұл шарадан ең көп зардап шегетін елдер қатарында Испания, Нидерланд пен Дания аталып отыр.

Айта кетейік, Еуроодақтың Қытаймен арадағы сауда балансы айтарлықтай теріс көрсеткішке ие. 2024 жылы ЕО-ның Қытаймен сауда тапшылығы 300 млрд еуродан асты. Соған қарамастан, еуропалық елдер Қытай нарығына негізінен шошқа етінің қосалқы өнімдерін экспорттап келген.

Қытайдың Сауда министрлігі енгізілген тарифтер шошқа етінің барлық түріне – жаңа сойылған, салқындатылған, мұздатылған, кептірілген, маринадталған, ысталған немесе тұздалған өнімдерге бірдей қолданылатынын нақтылады.

Бұған дейін, осы жылдың жазында Қытай Францияда негізінен өндірілетін еуропалық коньякқа да антидемпингтік баж салығын енгізген еді. Алайда ірі бренд өндірушілерге белгілі бір жеңілдіктер қарастырылған. Сонымен қатар Еуроодақтан әкелінетін сүт өнімдеріне қатысты да антидемпингтік тексерулер жүргізілген.

Оқи отырыңыз: Бектенов азық-түлік бағасын тежеу шараларын күшейтуді тапсырды

Еуроодақтың Қытайға шошқа етін экспорттауы 2020 жылы ең жоғары деңгейге жетіп, 7,4 млрд еуроны құраған. Ол кезеңде Қытай ішкі нарықтағы тапшылықты жабу үшін импортқа жүгінуге мәжбүр болған, себебі елдегі шошқа фермалары африкалық шошқа обасынан қатты зардап шеккен еді.