1 млрд теңгеден астам шығын: Nazira Gold қаржы пирамидасын ұйымдастырушыға қатысты үкім күшінде қалды

2024 жылғы мамырдан 2025 жылғы ақпанға дейін азаматтарға қаржы пирамидасына салған қаражаттан жоғары табыс табуға уәде беріліп, олардан жалпы сомасы 1,2 млрд теңгеден астам ақша тартылған.

Алынған қаражат қымбат автокөліктер, жылжымайтын мүлік және зергерлік бұйымдар сатып алуға жұмсалған. Мүліктің шығу тегін жасыру үшін ол туыстары мен өзге адамдардың атына рәсімделген.

Сот үкімімен 392,9 млн теңге қолма-қол ақша, құны 896,3 млн теңге болатын 17,8 келі алтын зергерлік бұйым, 186,9 грамм күміс бұйым, сондай-ақ 52 автокөлік, тұрғын үйлер, пәтерлер мен коммерциялық жылжымайтын мүлік мемлекет кірісіне тәркіленді.

Сот актісінде 151 жәбірленуші көрсетілген. Олардың 76-сының пайдасына келтірілген материалдық шығын өндірілді. 12 жәбірленушінің азаматтық талаптарын қанағаттандыру құқығы танылып, шығын мөлшерін анықтау мәселесі азаматтық сот ісін жүргізу тәртібімен қаралатын болды. Тағы 63 жәбірленушіге тиісті талаптармен азаматтық сотқа жүгіну құқығы түсіндірілді.

Сотталған әйелге мүлкін тәркілей отырып, 10 жылға бас бостандығынан айыру жазасы тағайындалды. Сондай-ақ оған жеті жыл бойы ақша мен инвестиция тартуға байланысты қызметпен айналысуға тыйым салынды. Асырауында кішкентай баласының болуына байланысты жазаны орындау бір жылға кейінге қалдырылды.

Кассациялық шағымдарда қорғаушы тарап сотталған әйелдің әрекеттері дұрыс сараланбағанын және тағайындалған жазаның тым қатаң екенін алға тартып, сот актілерінің күшін жоюды сұрады. Жәбірленушілердің бір бөлігінің өкілі тәркіленген мүлік келтірілген шығынды өтеуге жұмсалуға тиіс деп есептеп, мүлікті тәркілеу туралы шешімді қайта қарауды өтінді.

Кассациялық сот сотталған әйелдің кінәсі дәлелдер жиынтығымен расталды деген қорытындыға келді. Заң дұрыс қолданылған, ал тағайындалған жаза жасалған қылмыстардың ауырлығына сай келеді. Сондай-ақ сот заңнамаға сәйкес, тәркіленген мүлік мемлекет кірісіне өткізілгенге дейін жәбірленушілердің талаптары қанағаттандырылуға тиіс екенін атап өтті.

Қарау қорытындысы бойынша кассациялық шағымдар қанағаттандырусыз қалдырылып, сот актілері өзгеріссіз қалды.