1 қаңтардан бастап әлеуметтік төлемдер артты

Елде қаңтардан бастап ең төменгі күнкөріс деңгейінің мөлшері артты. Базалық және ынтымақты зейнетақы 10 пайызға өсті.

Мемлекеттік жәрдемақылар көлемі де ұлғайды. Биыл әлеуметтік көмек саласында тағы қандай өзгеріс бар? 

Жаңа жылдан бастап айлық есептік көрсеткіш мөлшері 4 325 теңгеге жетті. Былтыр ол 3932 теңге еді. Сәйкесінше, елде жәрдемақы мен түрлі әлеуметтік төлемдердің көлемі артты. Енді мемлекет әрбір жаңа туған балаға 149 416 теңгенің орнына 164 350 теңге төлейді. Екінші және үшінші туған балаға осындай көлемде жәрдемақы қарастырылған. Төртінші және одан кейінгі баланың туылуына 272 мың теңгеден астам біржолғы төлем төленеді. Сондай-ақ көпбалалы отбасыларың ай сайынғы жәрдемақысы былтырға қарағанда көбейді. Жаңа жылдан бастап барлық топтағы мүгедектігі бар адамдардың жәрдемақысы да артты.

Бала туғанда берілетін біржолғы жәрдемақы

1, 2, 3 балаға -  ₸149  416 - ₸164 350

4 бала және одан кейін - ₸247  716 - ₸272  475

Көпбалалы отбасыларға ай сайын жәрдемақы

4 бала - ₸63  030 -  ₸69 330

10 бала - ₸157  280 - ₸173  000

Жақсыбек Жиеналиев, Қазақстандық қоғамдық даму институтының сарапшысы, әлеуметтанушы:

- Қазіргі кезде мемлекетпен бекітілген 42 әлеуметтік төлемнің түрі бар. 2025 жылы 6,5%-ға өссе, бүгінгі таңда бұл төлемдердің пайыздық көрсеткіші 10 %-ға өсіп отыр. Бұл бірінші кезекте ішкі инфляцияға байланысты соған сәйкес жыл сайын индексацияланып отырады осы төлемдер. Қазақстандағы әлеуметтік төлем азаматтардың базалық өмірлк қажеттіліктерін өтеуге бағытталған.

Биыл әлеуметтік төлем тағайындау процесінде ауқымды цифрлық реформа күтіледі. Бір жағынан қағазбастылық азайса, екінші жағынан ашықтық артады. Бұған дейін анықталып жүрген заңсыздықтарды тыйып, әлеуметтік осал топтарды тиісті қолдаумен қамту көзделіп отыр.

Жақсыбек Жиеналиев, Қазақстандық қоғамдық даму институтының сарапшысы, әлеуметтанушы:

- Біздерде көбісі шатастырып жатады. Жалпы әлеуметтік төлемдерді мұқтаж адамдарға берілетін бұны қосымша табыс көзі деп қарайтындар көбейіп кетті. Бұл олай болмауы керек. Бұл уақытша азаматтарға қиын жағдайда қалған уақытша жәрдемдесу, олардың әрі қарай жұмыс істеп кетуіне, олардың кәсіби тұрғыдан өзін дамытуына, білімін, біліктілігін арттыруына жұмсалуы керек ақша. Мемлекеттік ресурсты жауапты органдар тиімді жауапкершлікпен пайдаланса өзінің нәтижесін береді. Санға емес, сапаға бағытталуы керек жұмыс.

Президент таяуда Түркістан газетіне берген сұхбатында: Әлеуметтік әділдікті қалпына келтіру үшін, ең алдымен, мәселені шешу жолдарын өзгерту қажет, - деді. Мемлекет көмекке шын мұқтаж адамдарға ғана тікелей, атаулы өтемақы төлеу арқылы қолдау көрсетуге міндетті.

Қасым-Жомарт Тоқаев, Қазақстан Республикасының Президенті:

- Қазақстан – әлеуметтік мемлекет. Денсаулық сақтау, әлеуметтік қамсыздандыру, ғылым және мәдениет саласына қатысты барлық міндеттеме толық орындалады. «Сырт көз – сыншы» деген сөз бар. Шетелдіктер, әсіресе, көрші мемлекеттердің тұрғындары біздің елдегі әлеуметтік қызметтің соншалықты дамығанына қызыға да, қызғана да қарайды. Соның ішінде кепілдік берілген тегін медициналық көмек және азаматтарға арналған көптеген жеңілдік бар.

Айта кетерлігі, биылдан бастап атаулы әлеуметтік көмек көлемі де 10 пайызға артты. Оның нақты сомасы отбасының жан басына шаққандағы кірісіне, отбасы мүшелерінің еңбекке қабілеттілігіне, балалар санына және өңірдің ең төменгі көнкөріс деңгейіне сай белгіленеді. Төлемді былтыр ел бойынша 54 мың шаңырақ алып, қазынадан 30 млрд теңге жұмсалды. Ал 66 мың отбасыға құжаттың дұрыс болмауы, талапқа сай келмеуіне байланысты атаулы көмек тағайындаудан бас тартылған.