16 жастағы мектеп оқушысы IT Queen cтартаптар байқауының жеңімпазы атанды

Оның жасанды интеллектіге негізделген чат-боты инсульттан кейін сөйлеу қабілеті бұзылған жандардың ойын жеткізуге көмектеседі.  IT Queen сайысының ерекшелігі сол – мұнда қыз-келіншектер құрған цифрлық шешімдер ғана сарапқа салынады.  

IT Queen байқауына Үкілі Омарова Алматы облысы, Қарабұлақ ауылынан келген. Мектеп оқушысы Астана хаб ұйымдастырған байқауға өтініш берген 90  үміткердің бірі. Кезінде атасы инсульт алып, сөйлеу қабілеті бұзылған еді. Ойын жеткізе алмай қиналғанын көрген Үкілі командалас қыздармен бірге арнайы бот ойлап табады. Осылайша, Сөйле AI чат-боты тілдің мүкістігін түсініп, оны мәтін мен аудио нұсқаға айналдырады.

Үкілі Омарова, IT Queen стартаптар байқауының жеңімпазы:

– Сөйле AI ол жасанды интеллект арқылы сөйлеу ақауларын түсініп, мәтінге және аудио нұсқасына аударып беретін бот. ДЦП немесе инсульттан кейін адамдардың сөйлеу қабілеті нашарлап, ойын жеткізуден қиналып қалады. Біз жүзден адамдардан сынақтан өткіздік. Қазір 19 клиникамен жұмыс жасаймыз.

IT Queen байқауының ақтық сынына 10 команда өткен. Финалда түрлі сала бойынша жасанды интеллектіге негізделген ІТ өнімдер ұсынылды. Оларды ұтымды цифрлық жобаларымен танылған қыз-келіншектер бағалады. Сөйтіп, жеңімпаздарға арналған 600 мың теңгенің жүлде қорын ең үздік үш стартапқа бөліп берді. 

Асылзат Исатай, қазылар алқасының мүшесі:

- Өзіміз де осы жолдан өткенбіз. Осындай Астана хабтың жасаған іс-шаралары шынымен көмектеседі. Қыздарға және басқа да стартаптарға. Команда, нарықтың үлкендігі, жаңағы негізін қалаушысының қандай тәжірибесі бар соның бәрін көреміз.

Айта кету керек, Астана хаб құрылғалы 7 жылда 1800-ден астам ІТ компанияға қолдау көрсетілген. Оның 400-ден астамы шетелдік, қалғаны отандық стартаптар.

Жанерке  Егеубаева, Astana Hub басқарушы:

- Біздің бастапқы қолдауларымыздың бірі – салықтық жеңілдіктер және де акселлерациялық, инкубациялық бағдарламаларға қатысу. Және визалық, жұмыс жөніндегі талаптарға көмек көрсету. Соның арқасында 1845, яғни 1800-ден астам айти компанияның 7 жылдағы табысы 4 млрд доллардан асқан еді.

Бақыт Топтаева, тілші:

- Отандық инвесторлардан бөлек, Астана хаб шетелдік венчур қорларынан да қаржы тартуға көмектесіп келеді. Осылайша, жеті жылда қазақстандық стартаптар 800 млн доллардан астам қаражат тартқан. Дені – Сөйле AI сияқты ғаламдық нарыққа шығаруға тұрарлық IT компаниялар.  

Авторлары: Бақыт Топтаева, Ғалымжан Әбілахат, Санжан Біргебаев