Павлодар облысында Үлгілі ауыл байқауының жеңімпазы атанды

Павлодар облысындағы Орлов ауылы «Үлгілі ауыл» облыстық байқауының жеңімпазы атанды, деп хабарлайды 24KZ. «Таза Қазақстан» ұлттық жобасы аясында ұйымдастырылған сайыста елді мекен жол жөндеу, абаттандыру және инфрақұрылымдық жобаларды жүзеге асыру бойынша жоғары нәтиже көрсетті.

Шарбақты ауданы 7 ауылдық округтен, 27 елді мекеннен тұрады. Соңғы екі жылда 80-нен астам жоба жүзеге асырылды. Әр ауылда жол жөнделіп, әлеуметтік нысандар толық жаңарды. 18 мыңға жуық тұрғыны бар ауданда ірі ауыл шаруашылық құрылымдары астық егіп, мал өсірумен айналысады. Үлгілі ауылдардың көшін бастаған Орлов елді мекенінің тарихы тереңде. Ең маңыздысы, ауыл халқы туған жерінде тұрақтап қалған.

Сержан Иманқұлов, Шарбақты ауданының әкімі:

- Орловка ауылы осы республикалық экологиялық акция аясында өткізілген үлгілі ауылдар конкурсында жүлделі орынға ие болып отыр. Негізгі көрсеткішті айтып өтетін болсақ, бұл жерде ауыл тұрғындарының туған ауылына деген жанашырлығы. Бюджет тарапынан қолдау бар бұл ауылға. Былтырғы жылдың өзінде біз үш көшесіне жөндеу жұмыстарын жасадық. Келесі жылы, мысалы, абаттандыру жұмыстарын жасауды жоспарлап отырмыз.

Орлов ауылында жұмыссыздық мүлдем жоқ. Тұрғындардың 90%-і жергілікті фермерлік шаруашылықта еңбек етеді. Азық-түлікті өздері өндіреді. Наубайхана, жартылай фабрикаттар мен бұқтырылған ет шығаратын шағын кәсіпорын тұрақты жұмыс істеп тұр.

Юлия Зубарева, ет өңдеу цехының технологы:

- Біз табиғи өнімдерді пайдаланамыз. Етті өзіміздің фермадан аламыз. Химиялық қоспаларды қолданбаймыз. Ауыл адамдарының көбі қазір мал ұстамайды. Себебі шығыны көп. Сондықтан біз шығарып жатқан азық-түлік түрлеріне ауыл мен қала тұрғындары арасында сұраныс жоғары.

Ауылға келген жас мамандар баспанамен қамтылады. Хореограф-педагог Ольга Ковтун үш жыл бұрын қаладан қоныс аударған. Ауыл балаларын биге баулып жүр. Орловтық өнерпаздар жуырда республикалық байқауда жүлделі орынға ие болды.

Ольга Ковтун, хореограф-педагог:

- Мен ауылға келгеніме ешқашан өкінген емеспін. Мұнда қатты ұнайды. Өмір сүруге қолайлы жағдайлардың бәрі бар. Балалардың дамуына қажетті мүмкіндіктер қарастырылған. Бұл өте маңызды, себебі балалар – біздің болашағымыз. Ауылдың таза ауасына ештеңе жетпейді.

Бір қызығы, бұл ауылдың қалыптасқан өз дәстүрі бар. Әр көшенің тазалығына жауапты арнайы адам бекітілген. Қаңғыбас ит, бос жүрген мал көрмейсіз.

Владимир Поляков, серіктестік директоры:

- Ауылды дамытуға мемлекет тарапынан көп көңіл бөлініп жатыр. Әсіресе ауыл шаруашылығы зор қолдауға ие. Бұл біз сияқты ірі кәсіпорын иелеріне үлкен жауапкершілік жүктейді. Менің ойымша, адамдар ауылда тұруы керек. Егін егіп, халықты асырауға шағын шаруашылықтар да үлес қосуы керек.

Мыңнан астам тұрғыны бар Орлов ауылы ел бойынша ең үздік 30 елді мекеннің қатарына кіреді. Бұл жергілікті билік, бизнес қауымдастығы және тұрғындардың өзара үйлесімді жұмысының нәтижесі болса керек.

Авторлары: Қарлығаш Қасиетова, Дәулет Қошқарбаев, Марат Игіліков