Студенттік сот процесі байқауының жеңімпазы анықталды

Астана халықаралық қаржы орталығының (АХҚО) Сотында жыл сайынғы «AIFC Court Moot» студенттік сот процесі байқауы өтті, деп хабарлайды Egemen.kz.

«AIFC Court Moot» – ағылшынның жалпы құқық дәстүріне негізделген, студенттер арасында өтетін сот процесі үлгісіндегі байқау. Іс-шара ұйымдастырушылары жыл сайын Қазақстан мен Еуразия өңірінің дарынды студенттерін жинап, болашақ заңгерлердің АХҚО Соты судьяларының алдында өз білімдері мен дағдыларын көрсетуіне мүмкіндік туғызады. Яғни, байқау аясында студенттерден құралған топтар ойдан шығарылған іс бойынша өз дәлелдерін (жазбаша және ауызша) дайындап, болашақ заңгерлер заңды талдау, құқықтық ұстанымдарды қалыптастыру және көпшілік алдында сөйлеу дағдыларын жетілдіріп, АХҚО Сотының аға судьяларының алдында жұмыстарын қорғайды.

Биылғы байқаудың финалына алдыңғы кезеңдерде көрсеткен жақсы нәтижелері бойынша іріктелген Мақсұт Нәрікбаев Университеті (Астана, Қазақстан) мен Шығыс Қытай Саяси ғылымдар және құқық университетінің (Шанхай, Қытай)  студенттері өтті. Финалды АХҚО Сотының төрағасы Мэлдон Лорды Бернетт және АХҚО Сотының басқа да  аға судьялары бағалады.

АХҚО және ХТО сотының тіркеушісі және аппарат басшысы Кристофер Кэмпбелл-Холт: «Біз АХҚО Соты студенттік сот процесі байқауы сегіз жыл қатарынан өткізіліп, қатысушы университеттердің оқу бағдарламасының ажырамас бөлігіне айналғанын мақтан тұтамыз. Осындай байқауларды өткізу арқылы біз заңгер студенттерге нақты сот істерінде клиенттердің мүдделерін қорғау үшін адвокаттардан талап етілетін жалпы сот жағдайында ауызша адвокатура машықтарын үйренуге және қолдануға бірегей мүмкіндік береміз. Студенттердің деңгейі жыл сайын жоғарылап келеді. Біз Еуразиядағы таңдаулы халықаралық коммерциялық сот ретінде негізгі серіктестерімізбен және заң қауымдастығымен тығыз қарым-қатынас қалыптастыруды жалғастырып келе жатқандықтан, бұл студенттер үшін де, біздің сот үшін де маңызды жарыс», дейді.

Жеңімпаздар кубогы  Шығыс Қытай Саяси ғылымдар және құқық университетінің (Шанхай, Қытай) студенттеріне берілді, ал соңғы турға өткен барлық студенттер АХҚО және ХТО Сотында тағылымдамадан өту мүмкіндігіне ие болды.

2018 жылдан бері АХҚО Сотының студенттік сот процесі байқауы Қазақстан мен Еуразия өңіріндегі құқық саласындағы дарынды жастарды қолдайтын маңызды алаңға айналды. АХҚО Соты мен Халықаралық төрелік орталығының (ХТО) тренинг орталығының білім беру бағдарламалары арқылы 4500-ден астам адам құқық үстемдігі мен халықаралық коммерциялық дауларды шешу қағидалары бойынша тегін білім алды. Сондай-ақ, 220-дан астам студент АХҚО Соты мен ХТО-да тағылымдамадан өтті.

Жыл сайын Қазақстан мен Еуразия өңірінен жүздеген студент АХҚО Соты мен ХТО ұйымдастыратын сот, арбитраж және медиация процестерінің байқауларына қатысады. Бұл байқаулар өңірдегі іскерлік және заң қауымдастығын дамуына үлес қосып, АХҚО Соты мен ХТО-ны халықаралық коммерциялық дауларды шешудегі жетекші институттар ретінде беделін арттырады. Сонымен қатар бұл байқаулар жас және тәжірибелі заңгерлерге инвесторлардың құқықтарын тиімді қорғау үшін маңызды дағдыларды дамытуға көмектеседі. Мамандар аталған іс-шара  Қазақстанға шетелдік инвестицияларды тартуға және елдің сот жүйесінде құқықтық қауіпсіздік пен инвесторлардың сенімін қамтамасыз етуге ықпал ететінін де айтады.