170 миллион өтемақы Samsung көшірме жасады деп айыпталды

Швейцариялық Swatch холдингі Samsung Electronics компаниясын смарт-сағаттарға арналған фирмалық цифрблаттар дизайнын заңсыз пайдаланды деп айыптап, 170 миллион доллар өтемақы талап етті. Дау Omega, Tissot және Breguet брендтері үлгілерінен негіз алған 26 дизайн нұсқасына қатысты болып отыр, деп хабарлайды Tengri Life.

Швейцариялық Swatch холдингі Samsung Electronics компаниясын смарт-сағаттарға арналған фирмалық цифрблаттар дизайнын заңсыз пайдаланды деп айыптап, 170 миллион доллар өтемақы талап етті. Дау Omega, Tissot және Breguet брендтері үлгілерінен негіз алған 26 дизайн нұсқасына қатысты болып отыр, деп хабарлайды Tengri Life.

Financial Times мәліметінше, сот талқылауы 2022 жылдан бері жалғасып жатыр. Осы уақыт ішінде Swatch британдық соттарда өз пайдасына шешімдер шығаруға қол жеткізді: Samsung Англияның Жоғарғы сотында жеңіліп, кейін апелляциялық сатыда бұл шешімге дау келтіре алмады. Енді сот өтемақы тағайындалған жағдайда оның мөлшерін анықтауы тиіс.

Шағым мәні неде?

Swatch мәлімдеуінше, оның 26 сағат цифрблатының дизайны құқық иеленушінің рұқсатынсыз Samsung смарт-сағаттарына арналған қосымшаларда қайталанған. Ресми түрде қосымшаларды үшінші тарап әзірлеушілері жасаған, алайда талап арыз нақты Samsung компаниясына қарсы түсірілген.

Талапкер пікірінше, жауапкершілік оңтүстіккореялық компанияға жүктеледі, себебі қосымшалар дүкенде жарияланбас бұрын оларды дәл осы компания тексеріп, мақұлдайды. Сонымен қатар Swatch мәліметінше, Samsung даулы цифрблаттардың кейбірін өз құрылғыларын жарнамалау кезінде пайдаланған.

Swatch деректері бойынша, Ұлыбритания мен Еуроодақ елдерінде мұндай қосымшалар 2015 жылдың қазаны мен 2019 жылдың ақпаны аралығында шамамен 160 мың рет жүктелген.

Неге Swatch шығынды 170 миллион долларға бағалады

Компания өз сағат дизайнына, оны кім пайдаланғысы келетініне қарамастан, лицензия бермейтінін мәлімдеді.

"Компания өнімдерінің дизайнына, әлеуетті лицензиат экономиканың қай саласына жататынына қарамастан, лицензия бермейді", - деп атап өтті Swatch өкілдері.

Холдингтің пікірінше, беделді үлгілер цифрблаттарының электронды көшірмелерінің жаппай қолданылатын құрылғыларда пайда болуы танымал брендтер құндылығы мен бірегейлігін төмендетеді. Сондай-ақ талап арызда Samsung "құнды және мұқият қорғалатын сауда белгілерін жаппай иемденіп алғаны" айтылған.

Осы ұстанымды негізге ала отырып, Swatch келтірілген шығынды 170 миллион долларға бағалады.

Samsung ұстанымы

Samsung бұл айыптармен келіспейді. Компания өкілдері сұралған өтемақы мөлшерін тым асыра сілтелген және жағдайдың нақты ауқымына сәйкес келмейді деп есептейді.

Компания шағым түскеннен кейін бірден даулы цифрблаттар қосымшалар дүкенінен алынып тасталғанын алға тартты. Сонымен қатар Samsung оларды өз бетінше жарнамалаумен айналыспағанын мәлімдеді.

Компания деректері бойынша, даулы цифрблаттардың көпшілігі тегін таратылған. Оларды жүктеуден түскен жалпы табыс 1000 доллардан сәл ғана асқан, оның ішінде тікелей Samsung-қа шамамен 300 доллар тиген.

Ықтимал өтемақыны есептеу кезінде Samsung талапкер көрсеткен сомаға емес, Swatch-пен жасалуы мүмкін болған гипотетикалық лицензиялық келісім құнына сүйенуді ұсынады. Сондай-аө компания адвокаттары швейцариялық сағат өндірушісіне нақты зиян келтірілмегенін, ал Samsung бұл қосымшаларды таратудан іс жүзінде пайда таппағанын айтып отыр.

Әрі қарай не болмақ?

Англияның Жоғарғы соты ықтимал өтемақы мөлшерін анықтауы тиіс.

Талап арыз Ұлыбритания Еуропалық одақтан шыққанға дейін берілгендіктен, британ сотының қорытынды шешімі Біріккен Корольдікте ғана емес, ЕО елдері аумағында да орындалуға жатады.

Бұдан бөлек, ұқсас дау АҚШ-та қаралуы тиіс, алайда америкалық сот бұл іспен Ұлыбританияда шешім шыққаннан кейін ғана айналысады.

Еске сала кетейік, Samsung Дуа Липаға қатысты атышулы даудың ортасында қалған болатын. Әнші компания оның фотосуретін рұқсатсыз жарнамаға пайдаланғанын айтып, 15 миллион доллар өтемақы талап етті. Samsung бұл айыппен келіспей, заң аясында әрекет еткенін мәлімдеді.

Тағы оқыңыз: Microsoft Apple мен Sony-ден кейін құрылғылардың бағасын көтереді

Google News арқылы жаңалықтарымызды қадағалаңыз

Жазылу