2026 жылғы қысқы Олимпиадаға жаңа спорт түрлері қосылды

Милан-Кортинада өтетін 2026 жылғы қысқы Олимпиада ойындары олимпиадалық қозғалыс тарихындағы ең ерекше әрі жаңашыл додалардың бірі болмақ.

Сонымен қатар аталған доданың жарыс бағдарламасына бірнеше жаңа дисцпилиналар қосылып, жарыс көркін қыздыра түспек.

2026 жылғы қысқы Олимпиада ойындарының соңғы жарыс бағдарламасы 2023 жылдың 20 маусымында жарияланды. Милан мен Кортина-д’Ампеццо қалаларында өтетін жарыстарда барлығы 116 жүлде жиынтығы сарапқа салынады. Бұл Бейжің-2022 ойындарынан 7 медальға көп.

Жарыс бағдарламасына жаңа спорт түрі енді. Алғаш рет қысқы Олимпиада ойындарында ски-альпинизм сайысы ұйымдастырылады. Ски-альпинизм - бұл табиғаттың сұлулығымен тілдесуге мүмкіндік беретін, адреналинге толы әрі төзімділікті талап ететін ерекше спорт түрі. 2026 жылы Милан мен Кортина-д’Ампеццода өтетін қысқы Олимпиада ойындарының бағдарламасына ресми түрде еніп, алғаш рет дебют жасайды. Олимпиада аясында жарыстар келесі үш бағыт бойынша өтеді: ерлер мен әйелдер спринті, аралас эстафета.

Бұдан бөлек басқа да спорт түрлерінде бірнеше дисциплина қосылып, өзгерістер енгізілді.

- Фристайл: ерлер мен әйелдер арасындағы параллельді могул;

- Шана спорты: әйелдер арасындағы қоссайыс;

- Шаңғымен тұғырдан секіру: әйелдер арасындағы сайыста да биік тұғыр пайдаланылады;

- Скелетон: аралас командалық жарыс.

Сондай-ақ жарыс бағдарламасынан тау шаңғы спортындағы параллельді алып слаломдағы аралас командалық бәсеке алынып тасталды.

Бұған қоса бірқатар спорт түрінде форматтық өзгерістер енгізілді. Мысалы шаңғы жарысында қашықтықтар ерлер мен әйелдер үшін бірдей болады (10 шақырым - жекелей сайыс, 20  шақырым - скиатлон, 50 шақырым - масс-старт, 4×7,5 шақырым - эстафета). Бұл бастама спортшыларға тең жағдай жасауға және оларға бірдей жарыс мүмкіндігін ұсынуға бағытталған.

Ал шаңғымен тұғырдан секіруде ерлер арасындағы командалық сайыста «Super Team» форматы қосылды. Яғни екі қатысушыдан құралған команда жүлде үшін сынға түседі. Сонымен қатар әйелдер де биік тұғырдан секіретін болады.

Шаңғы қоссайысындағы ерлер арасындағы командалық жарыс (биік тұғыр + командалық спринт 2×7,5  шақырым) бұрын төрт қатысушыдан құралса, енді тек екі спортшы қатысатын форматқа ауыстырылды.

Тау шаңғы спорты: жекелей комбинациялық жарыстар командалық форматқа ауыстырылды. Енді екі қатысушыдан құралған командалар бақ сынайды.

Шана спорты: аралас эстафетада төрт қатысушының орнына, әр командада алты қатысушы болады (үш ер, үш әйел). Бұл өзгерістер гендерлік теңдікті нығайтуға, спорт түрлерін жаңартуға және жаңа аудиторияны тартуға бағытталған.

2026 жылғы қысқы Олимпиада ойындары тек ауқымды спорттық дода емес, сонымен қатар жаңашылдық, теңдік және спорт инфрақұрылымын тиімді пайдалану құндылықтарын көрсететін маңызды кезең болмақ.

Дереккөз: Olympic.kz