2027 жылға қарай Қазақстан энергия тапшылығынан құтылуды жоспарлап отыр

Премьер-министр Олжас Бектенов электр энергетикасы саласын дамыту мәселелері бойынша кеңес өткізіп, саладағы жобаларды іске асыру қарқынын жеделдетуді талап етті.

Жиынға Премьер-министрдің бірінші орынбасары Роман Скляр, «Самұрық-Қазына» ҰӘҚ» АҚ басқарма төрағасы Нұрлан Жақыпов, Үкімет Аппаратының басшысы Ғалымжан Қойшыбаев, ұлттық экономика министрі Серік Жұманғарин, энергетика министрі Ерлан Ақкенженов, сондай-ақ «Самұрық-Энерго» мен KEGOC ұлттық компанияларының басшылары қатысты.

Кеңесте Президенттің «Жасанды интеллект дәуіріндегі Қазақстан» атты Жолдауында қойылған міндеттер аясында энергетикалық инфрақұрылымды жаңғырту және жаңа генерациялық қуаттарды іске қосу барысы талқыланды. Энергетика министрлігінің мәліметінше, жалпы инвестиция көлемі 13 трлн теңгеден асатын, қуаты 15,3 ГВт болатын 81 жоба жүзеге асырылып жатыр. Олардың басым бөлігі жеке инвестициялар есебінен іске асуда.

Энергетика министрі Ерлан Ақкенженов алдағы үш жылда маневрлі генерацияны дамыту арқылы реттеу қуаты тапшылығын жою жоспарланып отырғанын айтты. Оның сөзінше, қазіргі жобалар іске қосылған жағдайда, 2027 жылдың бірінші тоқсанының соңына дейін елдің электр энергиясына деген қажеттілігі толық өтеліп, 2029 жылға қарай тұрақты профицитке қол жеткізу көзделіп отыр. Ал 2035 жылға дейін қосымша 26 ГВт-тан астам жаңа қуат көздері пайдалануға берілмек.

Премьер-министр жобалардың мерзімін созу тәжірибесін қатаң сынға алды.

«Президент энергетика саласында жеткілікті динамика жоқ екенін бірнеше рет атап өтті. Барлық жоспарланған жобалар белгіленген мерзімде іске асуы тиіс. Министрлік, “Самұрық-Энерго” және KEGOC басшылары әрбір нысан үшін жеке жауап береді. Жұмыс орындарыңыз кабинетте емес, құрылыс алаңдарында болуы керек», — деді Олжас Бектенов.

Энергетика министрлігінің дерегінше, 2025 жылы электр энергиясын тұтыну 124,6 млрд кВтсағ болса, өндіріс көлемі 123,1 млрд кВтсағ-қа жеткен. Белгіленген қуат бір жылда 25,3 ГВт-тан 26,7 ГВт-қа дейін артқан. Генерация құрылымында көмір стансалары басым болғанымен, газ генерациясы мен жаңартылатын энергия көздерінің үлесі өсіп келеді.

Сондай-ақ кеңесте Екібастұз ГРЭС-3, Курчатовтағы жаңа станса және бірқатар өңірлік ЖЭО құрылысы, сондай-ақ ұлттық электр желісін күшейтуге бағытталған ірі инфрақұрылымдық жобалардың жүзеге асу барысы қаралды. Барлық желілік жобалар 2027 жылға дейін аяқталады деп жоспарланған.

Бүгін, 17:15