30 жастағы математика мұғалімі оқушылардың білім биігіне жол ашты

30 жастағы математика пәнінің мұғалімі Нұрбек Күнғожин бүгінде алматылық оқушылардың білім биігін бағындыруына жол ашуда. Өзі де кезінде талай олимпиаданың жеңімпазы атанған жас ұстаз сол тәжірибесін шәкірт тәрбиесіне жұмсайды. Оның шәкірттері бүгінде республикалық және халықаралық деңгейдегі білім сайыстарында жүлделі орындарға ие болып жүр. 

Қарапайым шаруа отбасынан шыққан Нұрбек Күнғожин егістік игеріп, дақыл егіп өскен. Бүгінде оқушыларға математика мәйегін егіп, білімнің болашағына үлес қосып жүр. Демалыс күндері ауылына барып, отбасына егін жинауға немесе шөп шабуға көмектесіп тұрады. Жас ұстазбен егін алқабында жүздесіп, математика мұғалімінің шаруашылықтағы шеберлігін көрдік. Нұрбектің айтуынша, қырдағы еңбек адам миын сергітіп, тәртіпке баулиды. 

Нұрбек күнғожин, Республикалық физика-математика мектебінің мұғалімі:

- Әкем ауыл шаруашылығының иесі. Ол кісі егінмен, мал шаруашылығымен айналысады. Сол әкеме жылда жазда барып көмектесемін, өзімнің бір парызым деп ойлаймын. Үй жұмысын істемейтін, ерінетін адам өсе келе өмірінде де еріншектігі пайда болатындай. Ең бастысы, кез келген бала үй шаруасынан бастау керек деп ойлаймын. 

Нұрбек Күнғожин - Алматыдағы республикалық физика-математика мектебінің үздік ұстаздарының бірі. Оның оқушылары республикалық, Азия-Тынық мұхит және басқа да беделді халықаралық математикалық олимпиадаларға қатысып, жүлделі орындар алып жүр. Мұғалімнің ендігі мақсаты – алтын медальға жету. Ғылым да егіншілік сияқты үнемі еңбек етуді және жаңалық ашуды талап етеді. 

Нұрислам Дүйсенғали, 10-сынып оқушысы:

- Нұрбек ағай бізге қағаз сияқты документ алып келеді. Бүкіл терминдер, теорема, есептер, барлығы бар. Оны шығарамыз және өзіміздің рейтингіміз болады. Кім қанша есеп шығарды, сол арқылы бізде жақсы бәсекелестік пайда болады. Әрқайсымызда есепті көбірек шығаруға, тақырыпты түсінуге мотивация бар. 

Нұрбек Күнғожиннің айтуынша, математикалық олимпиадалар спорттық жарыстарға ұқсайды. Дайындық кезінде балалар күніне 8–12 сағат есеп шығарады. Психологиялық тұрақтылық та маңызды. Оқушы сасқалақтамай, білімін көрсете білуі керек. Себебі спортта да, ғылымда да жеңіске жету үшін сенім мен дұрыс көңіл күй қажет. 

Нұрбек Күнғожин, Республикалық физика-математика мектебінің мұғалімі:

- Кезінде маған әкем: «білімді ешқашан жалғыз алып жүрме», - дейтін. Сонымен қатар спортты бірге алып жүру керек. Неге? Себебі бәсекелестікке құштарлықты үйрететін ол – спорт. Спортта сен бәсекелестікке үйренесің, сол өзінің үйренгеніңді білімде қолдануға болады. Сол себепті спорт пен математикалық олимпиадалар жаттығуы да, психологиялық дайындығы да ұқсас.

Айта кетейік, бүгінде халықаралық олимпиада жүлдегерлеріне 6 млн теңгеге дейін сыйақы тағайындалған. Жақында Нұрбек Қүнғожин «Шапағат» медалімен марапатталды. Бұл білім саласын дамытуға қосқан үлесі үшін берілді. Алайда ұстаз үшін ең басты жетістік – шәкірттерінің жеңісі.

Авторлары: Аршын Кемелжан, Айдос Қалиев