4 рет пышақ сұққан: Атырау облысында енесі келінінің қолынан қаза тапты

Атырау облысының Қызылқоға ауданында қайғылы оқиға тіркелді. 82 жастағы зейнеткер әйел өз үйінде қаза тапқан. Марқұм ұзақ уақыт бойы ауыр дертке шалдыққан, төсекке таңылған және тұрақты күтімді қажет еткен, деп хабарлайды Sn.kz.

Тергеу деректеріне сәйкес, оқиға болған күні үйде тек марқұм мен оның 38 жастағы келіні ғана болған. Әйел асүй пышағын пайдаланып, қарт туысына шабуыл жасап, басы мен денесіне кемінде төрт рет пышақ сұққан.

Жәбірленуші шұғыл түрде аудандық ауруханаға жеткізілгенімен, дәрігерлер оның өмірін аман алып қала алмады.

Аталған дерек бойынша Қазақстан Республикасының Қылмыстық кодексінің 99-бабы ("Адам өлтіру") бойынша қылмыстық іс қозғалды. Күдікті қамауға алынып, уақытша ұстау изоляторына жеткізілді.

Тергеу барысында тағайындалған сот-медициналық және психологиялық-психиатриялық сараптамалар күдіктінің созылмалы психикалық ауру – параноидты шизофрениямен ауыратынын анықтаған.