Абу Дабидегі үшжақты келіссөздің екінші күні

Абу Даби қаласында АҚШ, Ресей және Украина арасындағы келіссөздің екінші күні өтті.

Күн тәртібінде аумақтық мәселелер. Украина президенті Владимир Зеленский отырыста Донбасстың болашағы басты мәселеге айналғанын атап өтті. Ресей мен Украина соғысын тоқтатуға бағытталған кездесу жабық форматта ұйымдастырылды. Дегенмен Ақ үй жұма күні басталған келіссөзді нәтижелі деп атады. Бұл - президент Трамп өкілдерінің Украина және Ресей делегациясымен келіссөзді алғаш рет бір уақытта жүргізуі. Басқосуға АҚШ тарапынан арнайы өкіл Стив Уиткофф пен кәсіпкер Джаред Кушнер қатысты. Ресей делегациясын Қарулы Күштер Бас штабы Бас басқармасының бастығы Игорь Костюков басқарса, Украина тарапынан ұлттық қауіпсіздік және қорғаныс кеңесінің хатшысы Рустем Умеров барды.