Әділетмин: Газпром және Нафтогаз ісі бойынша АХҚО сотының шешімі Қазақстан аумағында орындалмайды

Әділет министрі Ерлан Сәрсембаев "Нафтогаздың" "Газпромға" қарсы ісі бойынша арбитраждық шешімді тану туралы АХҚО сотының шешіміне қатысты түсініктеме берді, - деп хабарлайды Tengrinews.kz.

Әділет министрі Ерлан Сәрсембаев "Нафтогаздың" "Газпромға" қарсы ісі бойынша арбитраждық шешімді тану туралы АХҚО сотының шешіміне қатысты түсініктеме берді, - деп хабарлайды Tengrinews.kz.

Министрдің айтуынша, ең алдымен, процессуалдық контексті түсіну маңызды.

"Сот бұйрығы біржақты тәртіппен - жауапкердің қатысуынсыз шығарылған. Бұл түпкілікті шешім емес: ол хабарлама сипатында және заңды күшіне енген жоқ. Жауапкер белгіленген мерзімде күшін жою туралы өтінішпен жүгінуге құқылы, содан кейін екі тараптың қатысуымен іс толыққанды қаралады. Қазіргі кезеңде қандай да бір орындау туралы айту ертерек", - деді Ерлан Сәрсембаев.

Сондай-ақ ол Қазақстан өзінің құқықтық байланысы жоқ шешімдерді орындау үшін транзиттік алаңға айналмайтынын айтты.

"Республиканың құқықтық тетіктері оның юрисдикциясына жатпайтын дауларды қарауды қарастырмайды, осыған байланысты АХҚО сотының қарастырылып отырған шешімі Қазақстан аумағында орындалмайды. Айта кету керек, істе АХҚО-мен юрисдикциялық байланыстың негізгі элементтері жоқ: "Газпром" ЖАҚ АХҚО қатысушысы емес, даулы мәміле АХҚО-да жасалмаған, дау АХҚО құқығымен реттелмейді және тараптар тану мен орындау мәселелерін АХҚО сотына беру туралы келісім жасасқан жоқ. Өз кезегінде "Астана" халықаралық қаржы орталығы туралы" Конституциялық заң АХҚО сотының юрисдикциясын АХҚО-мен байланысты және тараптардың келісімі бойынша оның қарауына берілген даулардың нақты санаттарымен шектейді".

Әділет министрі Қазақстан 1958 жылғы Нью-Йорк конвенциясының қатысушысы екенін, оған сәйкес шетелдік арбитраждық шешімдерді орындау орындаушы мемлекеттің процессуалдық нормаларына сәйкес жүзеге асырылатынын түсіндірді.

"Біздің жағдайда бұл - Қазақстан Республикасының Азаматтық процестік кодексі, оның 503-бабында мәжбүрлеп орындату туралы өтініш дау қаралған жер бойынша немесе заңды тұлға органының орналасқан жері бойынша, ал егер орналасқан жері белгісіз болса, онда борышкердің мүлкі орналасқан жер бойынша берілетіні белгіленген. "Газпромның" орналасқан жері белгілі. Бұл - назардан тыс қалдыруға болмайтын маңызды процессуалдық бағдар".

Сондай-ақ ол "Газпром" ЖАҚ-қа қатысты сот процесі неге АХҚО сотында туындағанын түсіндірді.

"Кез келген тұлға сотқа жүгінуге құқылы, бірақ бұл әрдайым соттың тиісті юрисдикциясы бар дегенді білдірмейді. Жаңа айтқанымдай, АХҚО сотындағы сот процесі әлі аяқталған жоқ. Сот екі тараптың ұстанымын тыңдауы керек, содан кейін түпкілікті шешім қабылданады. Сонымен қатар, қазіргі уақытта Әділет министрлігі мемлекет аумағында шетелдік арбитраждық шешімдерді тану және орындау бөлігінде Қазақстан Республикасының заңнамасына өзгерістер енгізу бойынша жұмыс жүргізіп жатыр. "Астана" халықаралық қаржы орталығы туралы" Конституциялық заң АХҚО сотына АХҚО-ға қатысы бар мәселелер мен тараптарға немесе дауларды қарауды АХҚО сотына беруге өзара келісімге келген тараптарға қатысты юрисдикциялық өкілеттіктер беретінін баса айтқым келеді".

Бұған дейін бірқатар БАҚ АХҚО соты "Газпром" және Украинаның "Нафтогаз" ісі бойынша шешім қабылдағанын хабарлаған болатын.