Экзитпол нәтижелері: Құрылтайға қанша партия өтті

Қазақстандағы Құрылтай депутаттарының сайлауындағы экзитпол нәтижелері жарияланды, - деп хабарлайды Tengrinews.kz тілшісі.

Сауалнама қорытындысы бойынша, 5 саяси партия Құрылтайға өтуі мүмкін. Мұндай мәліметтерді "Астана кешенді әлеуметтік зерттеулер институты" ұсынды.

Құрылтай парламенттік сайлауындағы экзитпол нәтижелері былай бөлінді:

"Әділет" партиясы – 71, 80 пайыз; Жалпыұлттық социал-демократиялық партия (ЖСДП) – 5,20%; "Байтақ" Қазақстан жасылдар партиясы – 1%; Қазақстан Халық партиясы (ҚХП) – 3%; "Ауыл" халықтық-демократиялық патриоттық партиясы – 6.40%; "Ақ жол" Қазақстан демократиялық партиясы – 5.10%; Respublica – 5,40%. Бәріне қарсы – 2,10%.

Экзитпол халықаралық стандартты әдістеме бойынша сұхбат түрінде жүргізілді. Қатысушыларға "Парламент сайлауында қай партияға дауыс бердіңіз?" деген бір ғана сұрақ қойылды.

Материал толықтырылып жатыр.

Анықтама: Экзитпол – бұл сайлаушылардың дауыс беріп шыққан бойда жүргізілетін сауалнамасы. Әдетте сұхбат алушылар сайлау учаскелерінің маңында тұрып, адамдардан кімге немесе қай партияға дауыс бергенін сұрайды. Қатысу ерікті түрде жүзеге асады. Экзитпол дауыстарды ресми санау аяқталғанға дейін сайлау нәтижелерінің алдын ала көрінісін алуға мүмкіндік береді. Сонымен қатар, оның нәтижелері сайлаудың ресми қорытындысы болып саналмайды және одан өзгеше болуы мүмкін.

Партиялар Құрылтайға өтуі үшін жалпы сайлаушылар дауысының кемінде 5 пайызын жинауға тиіс.

Айта кетейік, сайлаудың алдын ала және түпкілікті қорытындысын кейінірек Орталық сайлау комиссиясы жариялайды. Соңғы нәтижелер 30 тамызға дейін белгілі болады.

23 тамыз – сайлау күні

Елімізде сайлау учаскелері сағат 7:00-ден 20:00-ге дейін ашық. Олар жабылғаннан кейін бірден дауыстарды санау басталады. Содан кейін аумақтық комиссиялар ОСК-ға нәтижелер бойынша есеп береді. Орталық сайлау комиссиясы қорытындыны арнайы отырыста шығарады.

Соңғы қорытындылар 30 тамызға дейін белгілі болады.

Еске салайық: сағат 12:00-дегі жағдай бойынша, барлығы 4 670 816 сайлаушы бюллетень алып, бұл 37,05 пайыз болды.

Ал сағат 10-ға қарай сайлауда 2 миллионнан аса қазақстандық дауыс берді. Алдын ала келу көрсеткіші 17,96 пайыз болды. Бұл сайлауда сайлаушылар тізіміне барлығы 12 605 788 адам енгізілген.

Бүгін елімізде Құрылтай депутаттарының сайлауы өтіп жатыр. Бұған дейін біз Құрылтай сайлауында кімдердің бірінші болып дауыс бергені туралы жазған болатынбыз. Токиода бір студент дауыс беруге қазақ биінің киімін киіп келді.

Google News арқылы жаңалықтарымызды қадағалаңыз

Жазылу