Байтақ партиясы экзитпол нәтижелерін қабылдады

Батыс Қазақстан, Қарағанды және Ақтөбе облыстарындағы партия өкілдері азаматтардың таңдауын мойындайтынын және саяси жұмысты жалғастыратынын мәлімдеді. Сонымен қатар олар нәтижелерді талдап, партия ішіндегі жұмыс тәсілдерін жаңарту қажет екенін атап өтті.

"Байтақ" партиясының Батыс Қазақстан облыстық филиалының жетекшісі Тұрсынбек Байтеміров өзінің Facebook парақшасындағы видеожолдауында партия сайлаушылардың таңдауына құрметпен қарайтынын және жарияланған алдын ала нәтижелерді қабылдайтынын айтты.

"Алдағы уақытта бүгінгі нәтижені ескере отырып, өз ұстанымымыз бен бағдарламамызды жүзеге асыруды жалғастырамыз. Қоршаған ортаны қорғау, таза су мен таза жер мәселелері бойынша нақты шешімдерге қол жеткізуге күш саламыз. Жұмысымызды жетілдіріп, келесі сайлауларға дайындаламыз", – деді Байтеміров.

Ол партия жақтастарына алғысын білдіріп, "Байтақтың" өз қызметін жалғастыратынын атап өтті.

Партияның Қарағанды облыстық филиалының жетекшісі Сейфул-Малик Қазитов нәтижелерге сыни тұрғыдан қарады. Оның айтуынша, экзитпол көрсеткіштері партия күткеннен төмен болған. Дегенмен "Байтақ" сайлаушылардың таңдауын мойындап, дауыс беру қорытындысын қабылдайды.

Қазитов Құрылтайға өткен партияларға азаматтардың сенімін ақтауды тіледі. Оның айтуынша, Құрылтайдағы жұмыс қоғам алдында үлкен жауапкершілікті талап етеді.

Сонымен қатар ол партия ішінде талдау жүргізуге шақырды. Оның пікірінше, сайлау науқаны кезінде "Байтақтың" барлық мүмкіндігі толық пайдаланылмаған және партияның барлық идеяларын сайлаушыларға жеткізу мүмкін болмаған.

Қазитов партияны басқару жүйесін реформалап, партия төрағасын ротациялауды ұсынды. Сондай-ақ партия мүшелерін оны жаңғырту жұмысына белсенді қатысуға шақырды.

"Байтақ" партиясының Ақтөбе облыстық филиалының жетекшісі Айман Сексенова да экзитпол нәтижелері партия күткен көрсеткіштен төмен болғанын айтты.

Оның сөзінше, өңірдегі сайлау учаскелерінде партия атынан 200-ден астам бақылаушы жұмыс істеген. Сексенова сайлаудың әділ өткенін айтып, партия азаматтардың таңдауын қабылдайтынын жеткізді.

Ол Құрылтайда өкілдік алған саяси күштерге тиімді жұмыс істеп, сайлаушылардың сенімін ақтауды тіледі.

Сонымен бірге Сексенова сайлау нәтижелерін партияның ішкі жұмыс тәсілдерін қайта қарауға себеп деп санайды. Ол партияның сайлауалды бағдарламасын талдап, оны партия мүшелерімен бірге талқылауды ұсынды. Сондай-ақ "Байтақ" мүшелерін партияны жаңғырту жұмысына белсенді араласуға шақырды.

Осылайша, "Байтақтың" үш өңірлік филиалының өкілдері партия сайлаудан кейін де саяси қызметін жалғастыратынымен келісті. Қарағанды және Ақтөбе облыстарында партия ішінде өзгерістер енгізу және жұмыс тәсілдерін қайта қарау қажеттігі ашық айтылды. Ал Батыс Қазақстан облысында негізгі назар экологиялық мәселелерді көтеруді және алдағы саяси жұмыстарға дайындалуды жалғастыруға аударылды.

Бұған дейін Құрылтай депутаттарын сайлауға қатысқан саяси партиялардың жетекшілері 23 тамызда дауыс беру аяқталып, экзитпол нәтижелері жарияланғаннан кейін өз пікірлерін білдіргені хабарланған болатын.