Агроөнеркәсіп өнімінің көлемі 6,1% ға артты

Ауыл шаруашылығы өнімдерінің жалпы көлемі 6,1%-ға артып, 9,2 триллион теңгеге жетті.

Бұл туралы Ауыл шаруашылығы министрі мәлімдеді. Айдарбек Сапаров өсімнің негізгі драйвері егін шаруашылығы болғанын атап өтті. Онда өндіріс көлемі 7,6%-ға артып, 5,8 триллион теңгені құрады. Ал мал шаруашылығында көрсеткіштер 3,5%-ға өсіп, 3,3 триллион теңгеге жеткен. 

Бұрын-соңды болмаған көрсеткіш. Еліміз экспортқа рекордтық көлемде астық жіберді.  Ұнды қоса алғанда мұндағы көлем 15 млн тоннадан асты. Ал жаңа орылған егіннен бүгінде 4 млн тоннаға тарта дақыл экспортталды. Бұл өткен жылдың сәйкес кезеңімен салыстырғанда 13,6%-ға артық. Диқандарымыздың өнімі 45 мемлекетке жеткізілді. Енді Ауыл шаруашылығы министрлігі экспорттың жаңа бағыттарын ашу бойынша жұмыс жүргізіп жатыр.

Айдарбек Сапаров, ҚР Ауыл шаруашылығы министрі:

- Жоғары экспорт дегеніміз – тек имидж ғана емес, бұл тікелей экономикалық пайда. Елімізге одан ұлттық валюта бағамын қолдайтын валюталық кіріс түседі. Диқандар сыртқы нарыққа астық сатудан түскен табысын техниканы жаңартуға және өндірісті дамытуға инвестициялай алады.

Биыл 7 елмен келіссөз жүргізіліп, 16 ветеринариялық сертификатқа қол қойылды. Жаңа нарықтарға қолжетімділіктің арқасында 10 айда сиыр етінің экспорты 30,2 мың,  ал қой еті – 25,5 мың тоннаға жетті. Биыл Әзербайжан , Моңғолия, Марокко, Иран  және ЕО нарықтары ашылды.

Айдарбек Сапаров, ҚР Ауыл шаруашылығы министрі:

- 7 елмен жүргізілген келіссөздер нәтижесінде 16 ветеринариялық сертификатқа қол қойылды. Қазіргі уақытта Жапонияға, Оңтүстік Кореяға, БАӘ елдеріне ет пен сүт жеткізу мәселесі пысықталуда. Қатар мен Ұлыбританиямен бал экспорты, ал Эквадормен бірге артемия асшаян уылдырықтарын жеткізу талқылануда. 

Егін - бітік, мал - қоңды. Шаруалар мұны мемлекет мезіретімен байланыстырып отыр. Биыл оларды қолдауға рекордтық 1 трлн теңге бөлінді. Соның әр тиыны ақталды. Мысалы, көктемгі дала және жиым-терімге 700 млрд теңге берілді. Нәтижесінде диқандар 27 млн тонна астық жинады. Малды бордақылауға 50 млрд теңге үлестірсді, кейін малшылар 800 мың тонна ет өндірді. Өңдеу өнеркәсібіне берілген 70 млрд теңге де өзін ақтады. Күнбағыс майы, құс еті, жұмыртқа өндірісі өсім көрсетті. Келесі жылы мемлекет осы қолдауды күшейте түседі. Оны Астанадағы форумда Қ. Тоқаев баса айтты.

Көктемгі дала және жиым-терім - ₸700 млрд 

Астық - 27 млн тонна

Мал бордақылау - ₸50 млрд

Ет - 816 мың тонна

Өңдеу өнеркәсі - 70 млрд

Жұмыртқа - 3,41 млрд

Құс еті - 276,2 мың тонна

Күнбағыс майы - 757,1 мың тонна  

Қасым-Жомарт Тоқаев, Қазақстан Республикасының Президенті 

Еліміз жайылымдық жер аумағы бойынша әлемде 6-шы орын алады. Ал егіс алқабы бойынша 8-орында тұр. Демек қолымызда қажетті ресурс бар, тек соны тиімді пайдалануымыз қажет. Соңғы он жылда ауыл шаруашылығының жалпы өнімі 2,5 еседен астам өсті. 2030 жылға дейін бұл көрсеткішті тағы 2 есе арттыруымыз керек. Бұл біздің қолымыздан келетін шаруа. 

Мемлекет басшысының тапсырмасына сәйкес, саланы дамытудың 2026-2030 жылдарға арналған кешенді жоспарын жүзеге асыру келер жылдан басталады. Министрлік мал шаруашылығын қолдау көлемін келешекте арттыра отырып, кемінде 200 млрд теңге қаржы бөлуді жоспарлауда. Қаражат қарқынды өсімге негіз болатын аналық мал импортына жұмсалады. Жауаптылар осылай дейді. 

Әлішер Әли