Air Astana ұшағы Астанадан ұшып шыққаннан кейін қозғалтқышы істен шыққанын хабарлады

Астана – Франкфурт бағыты бойынша халықаралық KC921 рейсін орындаған Air Astana ұшағы техникалық себептерге байланысты Ақтөбеге қонуға мәжбүр болды, деп хабарлайды Tengri Travel әуе компанияға сілтеме жасап.

Астана – Франкфурт бағыты бойынша халықаралық KC921 рейсін орындаған Air Astana ұшағы техникалық себептерге байланысты Ақтөбеге қонуға мәжбүр болды, деп хабарлайды Tengri Travel әуе компанияға сілтеме жасап.

Тасымалдаушы мәліметінше, борт Астанадан жергілікті уақытпен сағат 08:54-те ұшып шыққан. Ұшу кезінде экипаж қосалқы аэродромға қону туралы шешім қабылдады.

Ұшақ Ақтөбеге сағат 11:34-те аман-есен қонды.

"Ұшақ техникалық себептерге байланысты Ақтөбеге қонды. Әуе кемесінің экипажы қауіпсіздіктің стандартты процедураларына сәйкес қону туралы шешім қабылдады. Қону штаттық режимде өтті", - делінген хабарламада.

Жолаушылар Алматыдан жіберілген резервтік бортпен ары қарай аттанады. Әуе компаниясы мәліметінше, Ақтөбеден жаңа ұшу уақыты сол күні сағат 14:20-ға жоспарланған.

Кейін Көлік министрлігінің баспасөз қызметі авиациялық оқиға зерттеліп жатқанын хабарлады.

"2026 жылғы 8 мамырда Air Astana әуе компаниясының тіркеу нөмірі EI-KGJ Airbus A321 әуе кемесімен Астана – Франкфурт бағыты бойынша KZR921 рейсін орындау барысында авиациялық оқиға болды. Астана әуежайынан ұшып шыққаннан кейін әуе кемесінің экипажы қозғалтқыштардың бірі істен шығуына байланысты PAN-PAN шұғыл сигналын жариялады. Экипаж қонуды жүзеге асыру үшін Ақтөбедегі қосалқы аэродромға бару туралы шешім қабылдады", - делінген хабарламада.

Ведомство мәліметінше, әуе кемесінің бортында 93 жолаушы, оның ішінде 4 бала мен 1 нәресте, сондай-ақ 9 экипаж мүшесі болған.

"Әуе кемесінің экипажы әуе кемесінің жедел ақпарат жинағында (QRH – Quick Reference Handbook) көзделген процедураларға сәйкес әрекет етті. Қонғаннан кейін әуе кемесі тұраққа өздігінен бет алды. Қауіпсіздікті қамтамасыз ету үшін авариялық-құтқару және әуежайдың тиісті жерүсті қызметтері жұмылдырылды", - деп хабарлады министрлік.

Баспасөз қызметі зардап шеккендер немесе әуе кемесінің зақымдануы туралы ақпарат әзірге түспегенін нақтылады.

"Авиациялық оқиға әуе кемесі күштік қондырғысының техникалық ақауына байланысты. Мәліметтерді ұсыну және авиациялық оқиғалар мен инциденттерді зерттеу қағидаларына сәйкес, авиациялық оқиға күрделі инцидент ретінде жіктеліп, Көліктегі оқиғалар мен инциденттерді зерттеу департаментімен зерттелуге тиіс", - деп толықтырды ведомство.

Алғашқы іс-шараларды жүргізу және ақпарат жинау үшін авиациялық оқиға болған жерге департамент қызметкері барады деп жоспарланған.

Естеріңізге сала кетейік, ұқсас жағдай 6 мамырда болған еді: SWISS әуе компаниясының Airbus A350 ұшағы Қазақстан аумағында ұшу кезінде дабыл белгісін берген. Flightradar24 сервисінің мәліметінше, борт Балқаш маңында болып, кейін Алматыға бағытталды. Кейін жоспардан тыс қонудың себебі белгілі болды - екінші пилоттың денсаулық жағдайының нашарлаған. Ұшақ шұғыл қонғаннан кейін оны жергілікті ауруханаға жатқызды.

Тағы оқыңыз: Swiss Air ұшқышы борттағы төтенше жағдайдан кейін Алматы ауруханасына жеткізілді

Google News арқылы жаңалықтарымызды қадағалаңыз