Alatau City Bank пен Binance Kazakhstan криптовалютамен төлем жасауды іске қосуда

Alatau City Bank Binance Kazakhstan-мен бірлесіп Crypto Pay сервисін іске қосты, деп хабарлаы банктің баспасөз қызметі.

Бұл ынтымақтастық Binance Kazakhstan пайдаланушыларына тауарлар мен қызметтерді Alatau City Bank эквайрингілік желісінің QR-кодтары мен POS-терминалдары арқылы криптовалютамен төлеуге мүмкіндік береді. Жаңа сервис күнделікті өмірде цифрлық активтерді пайдалануды әдеттегі қолма-қол ақшасыз төлемдер сияқты қарапайым және ыңғайлы етеді.

Сервис бірінші болып Қазақстан Республикасының Президенті Қасым-Жомарт Тоқаевқа Alem.ai жасанды интеллект орталығында таныстырылды. Бүгінде жоба күнделікті сауда жасау үшін цифрлық активтерді пайдаланудың жаңа тәсілін аша отырып, технологияны таныстырып-көрсетуден толыққанды іске қосуға көшіп жатыр.

Бизнес үшін жаңа сервисті пайдалану қарапайым әрі үйреншікті болып қалады. Кәсіпкерлерге криптовалюта әмияндарын ашудың, цифрлық активтердің жұмыс ерекшеліктерін түсінудің немесе қолданыстағы төлем инфрақұрылымын өзгертудің қажеті жоқ. Қаражат автоматты түрде теңгеге айырбасталып, банк шотына түседі, ал сатушы криптовалюта бағамының ауытқуына қарамастан, чекте көрсетілген соманы алады. Осының арқасында компаниялар өз клиенттеріне үйреншікті бизнес-процестерді сақтай отырып және валюталық тәуекелдерді болдырмай, тағы бір заманауи төлем тәсілін ұсына алады.

Сервистің Alatau City Bank-тің қолданыстағы эквайрингілік желісімен сәйкестендіріліп қойғаны аса маңызды. Банктің POS-терминалдарын қолданып жүрген кәсіпкерлер төлемді қосымша құрал-жабдықтар сатып алмай немесе күрделі техникалық интеграциясыз криптовалютамен қабылдай алады. Жаңа серіктестер үшін Alatau City Bank эквайрингін қосу жеткілікті, содан кейін сервис автоматты түрде қолжетімді болады.

«Криптотөлемдерді іске қосу арқылы біз цифрлық активтер күнделікті экономиканың қалыпты бөлігіне айналатын, ал оларды тауарлар мен қызметтерге төлем жасау үшін пайдалану қолма-қол ақшасыз банктік төлемдер сияқты қарапайым, қауіпсіз және үйреншікті болатын болашаққа қадам жасаймыз. 

Біздің міндетіміз — дәстүрлі қаржы жүйесі мен цифрлық активтер нарығы арасындағы кедергілерді жою. Пайдаланушылар активтерді дербес айырбастау және қаражатты криптобиржадан шығару қажеттілігінсіз тікелей криптовалютамен сатып алу ақысын төлеу мүмкіндігіне ие болады, ал кәсіпкерлер әдеттегі бизнес-процестерді өзгертпестен теңгемен төлем алуды жалғастырады.

Біз мұндай шешімдерді дамыту нақты экономикаға цифрлық активтерді кеңінен енгізуге ықпал ететініне, төлем индустриясын дамытуды жеделдететініне және жалпы бизнес, пайдаланушылар және қаржы нарығы үшін жаңа мүмкіндіктер ашатынына сенімдіміз», – дейді Alatau City Bank-тің Цифрлық активтер жөніндегі басқарушы директоры Ұлан Хаким.

«Binance-та біз цифрлық активтерді практикалық пайдалану мүмкіндіктерін ретімен кеңейтеміз. Қазақстанда Crypto Pay (Powered by Binance Pay) іске қосу — бұл Binance жергілікті экожүйесін дамытудағы маңызды кезең, ол пайдаланушыларға криптовалютаны инвестициялық құрал ретінде ғана емес, күнделікті тауарлар мен қызметтерді төлеудің ыңғайлы құралы ретінде де қолдануға мүмкіндік береді. Біздің мақсатымыз — криптовалютаның артықшылықтарын әдеттегі төлем сценарийлерімен біріктіре және пайдаланушылар мен бизнес үшін одан да көп мүмкіндіктер жасай отырып, цифрлық активтерді қазіргі заманғы қаржы инфрақұрылымының қолжетімді бөлігіне айналдыру», — деп атап өтті Binance Kazakhstan бас менеджері Нұрхат Күшімов.