Ұшақ жолаушысының сөмкесіндегі зат қайғылы жағдайға әкеп соға жаздады

Гонконгтен Оңтүстік Кореяның Чеджу аралына бет алған HK Express әуекомпаниясының рейсінде жолаушы орындығының астындағы сөмкеде жатқан пауэрбанк қызып кетті. Құрылғыны шығарып алмақ болған әйел сол қолының бас бармағын күйдіріп алды, деп хабарлайды Tengri Travel Bangkok Post сайтына сілтеме жасап.

Не болды?

Оқиға HK Express әуекомпаниясының UO676 рейсінде болған. Бортта 236 жолаушы мен экипаждың жеті мүшесі болды. Гаджет орындық астындағы сөмкеде жатқан және Чеджу әуежайына қону алдында төмендеу кезінде қатты қыза бастаған.

Зардап шеккен адам - 50 жас шамасындағы Гонконг тұрғыны. Ол пауэрбанкті алып шықпақ болғанда, сол қолының бас бармағын күйдіріп алған. Оңтүстік Корея БАҚ-тарының мәліметінше, құрылғының өзі де Гонконгте өндірілген.

Әуекомпания ұшақтың жергілікті уақыт бойынша сағат 06:00 шамасында Чеджуға аман-есен қонғанын хабарлады. Қонғаннан кейін бірден дәрігерлер әйелді қарап, қажетті көмек көрсетті. Басқа жолаушылар мен экипаж мүшелері зардап шеккен жоқ.

Бортсеріктер нұсқаулыққа сәйкес жедел әрекет етті: олар қызып кеткен пауэрбанкті арнайы ыстыққа төзімді өртке қарсы қапқа салып, құрылғыны толық суыту және өрттің алдын алу үшін суға батырған.

Литий батареялары бар гаджеттер ауадағы төтенше жағдайларға жиі себеп болып жатады. Осы айдың өзінде бұл жалғыз оқиға емес: 11 қазанда Үндістанның IndiGo әуе компаниясының Делиден Ченнайға ішкі рейсті орындаған ұшағы салон ішінде пауэрбанктің тұтануына байланысты Хайдарабад қаласына шұғыл қонды.

Бізді Google-дың негізгі дереккөздер тізіміне қосыңыз