Алдағы үш күнде жаңбыр жауып, жел тұрады Қазгидромет

Синоптиктердің мәліметінше, атмосфералық ағындардың өтуіне байланысты еліміздің басым бөлігінде күн құбылмалы болады. Көп өңірде найзағай ойнап, жаңбыр жауады.

Оңтүстік, оңтүстік-шығыс аймақтарда, сондай-ақ 4 мамыр күні солтүстік-батыста нөсер жаңбыр жаууы ықтимал. Кей жерлерде бұршақ түсіп, екпінді жел соғуы мүмкін. Түнгі және таңғы уақытта республика бойынша тұман түсуі ықтимал.

Батыс, солтүстік-батыс, солтүстік және орталық өңірлерде түнде 3 градусқа дейін үсік жүреді.

Күндіз ауа температурасы біртіндеп көтеріледі:
батыста +17…+32,
солтүстік-батыста +15…+30,
солтүстікте +15…+23,
орталықта +17…+27 градусқа дейін жетеді.

Ал шығыс пен оңтүстік-шығыста күндізгі температура төмендеп, тиісінше +14…+25 және +13…+23 градус шамасында болады.

Осыған дейін ТЖМ табиғатта және су жағасында қауіпсіздік ережелерін сақтауға шақырды.