Әлемдегі ең қауіпсіз авиация

Әлем бойынша күніне 10 млн жолаушы ұшақпен қатынайды. Өйткені әуе кемесі ең қауіпсіз көлік саналады.

Десе де кейінгі уақытта ұшақ апаты жиілеп кетті. Былтырдың өзінде 95 әуе апаты тіркеліп, 296 адам көз жұмған. Қазір жолаушыларға мыңға тарта әуе компаниясы қызмет көрсетеді. Соның ішінде тек 25-і ғана ұшуға қауіпсіз деп танылған.

Халықаралық азаматтық авиация ұйымының бағалауы бойынша, еліміздің авиация саласындағы қауіпсіздігі Біріккен Араб Әмірліктері, Қатар, Сауд Арабиясы сынды мемлекеттермен теңестірілген. Бұл елдердегі авиация саласы барлық техникалық қызмет көрсету, инспекция және ұшу қауіпсіздігі стандарттары бойынша ICAO және Халықаралық әуе көлігі қауымдастығына сай келеді. Дубай, Доха және Абу-Даби - әлемдік авиациялық хабқа айналған. Таяу Шығыс және Солтүстік Африка аймағындағы ең ірі жолаушы тасымалдаушылары. Әрі оларда кейінгі 10 жылда бірде-бір өлімге әкелген апат тіркелмеген.  

Ұшуға қауіпсіз әуе желілері

Әуе компаниялары мен олардың қауіпсіздігіне баға беретін әлемде жалғыз сайт бар. AirlineRatings.com-ның мамандары 385 бірлестіктің ішінен биыл ұшуға қауіпсіз 25 әуе желісін атады. Үздіктер қатарына Еуропа, Азия, АҚШ және Түркия компаниялары кірді. Олар ұшу қауіпсіздігі, инновация мен жаңа ұшақтарды іске қосу бойынша алда. Арасында көпке танымал Emirates, Lufthansa, United Airlines сияқты бірлестіктер бар. Әуе желілерінің қауіпсіздігі рейтингін жасағанда кейінгі бес жылдағы әуе апаттары, екі жыл ішіндегі келеңсіз жайттар назарға алынған. Сондай-ақ асаладағы жетекші органдар мен түрлі қауымдастықтың тексерісі және компанияның қызметкерлерін дайындау деңгейі ескерілген.    

Ұшақ қауіпсіздігі - жолаушы жауапкершілгі

Ұшу кезіндегі қауіпсіздік техникалық тексерістерден бөлек, жолаушылардың тәртібіне тікелей байланысты. Халықаралық Азаматтық авиация ұйымының дерегі бойынша, ұшақ ішінде белгілі ережелерді сақтамағаны үшін жолаушылар өз елінің заңнамасына сәйкес жауапқа тартылады. Мәселен, АҚШ азаматы салон ішінде агрессивті мінез-құлық танытқаны үшін 37 мың доллар айыппұл төлейді. Бұл теңгемен 20 млн. Егер бұл қайталанатын болса, құқықбұзушы сол әуекомпанияның қара тізіміне енгізіліп, ұшу мүмкіндігінен айырылуы мүмкін. Ал Ұлыбританияда әуе компаниялары ұшақтың, экипаждың немесе жолаушылардың жайлы ұшуына кедергі келтіретін азаматтарды тасымалдаудан бас тартуға құқылы. Мәселен, бортқа мас күйде кіргені үшін £5000 көлемінде айыппұд төлейді және 2 жыл бас бостандығынан айыру қарастырылған.    

Авторы: Фариза Жанғанаева