Әлеуметтік сауалнама Қазақстан Президентіне деген сенім деңгейінің жоғары екенін көрсетті

Қазақстан Президенті Қасым-Жомарт Тоқаевқа сенім деңгейі 85,7 пайызды құрады. Мұндай мәліметті 20 шілде мен 6 тамыз аралығында жүргізілген әлеуметтік зерттеу қорытындысы бойынша "Демократия институты" ғылыми-зерттеу қауымдастығы ұсынды, деп хабарлайды Tengrinews.kz.

Сауалнамаға кімдер қатысты?

Зерттеуге 17 облыс пен республикалық маңызы бар үш қала – Астана, Алматы және Шымкенттен 18 жастан асқан 8 мың респондент қатысты.

Сауалнама нәтижесіне сәйкес, қатысушылардың 85,7 пайызы "иә" немесе "иә деуге болады" деген жауаптарды таңдап, Президентке сенім білдіретінін мәлімдеді.

"Зерттеу 18-29 аралығындағы жастардың Президентке жоғары деңгейде сенім білдіретінін анықтады. Осы жас тобындағылардың 90,1 пайызы ("ия" және "ия деуге болады" жауаптарының ортақ көрсеткіші) Президентке сенім артатынын білдірді. Бұл сауалнамаға қатысқандарды жас санаттары бойынша талдағандағы ең жоғары көрсеткіш", - делінген хабарламада.

С ндай-ақ зерттеу білім деңгейі мен Президентке деген сенім арасындағы байланысты анықтады. Білім деңгейі төмен респонденттер арасында бұл көрсеткіш 81,8 пайызды құраса, жоғары білімі бар азаматтар арасында 89,7 пайыз болды.

Сауалнама елдің даму бағытына қолдау деңгейі жоғары екенін де көрсетті. Азаматтардың 81,5 пайызы Қазақстан дұрыс немесе дұрыс бағытта дамып келе жатыр деп санайды.

Президентке сенім жағдайындағыдай, ең жоғары көрсеткіш 18-29 жас аралығындағы жастар арасында тіркелді – 85,4 пайыз.

Жас ұлғайған сайын елдің даму бағытын оң бағалайтын респонденттердің үлесі төмендейді, бірақ бәрібір жоғары деңгейде қалады. 60 жастан асқан қатысушылар арасында бұл көрсеткіш 76,9 пайызды құрады.

"Президентке сенім білдіретіндер арасында білім деңгейі бойынша жоғары білімділер ең жоғары көрсеткішті құраса, Қазақстанның даму бағытын дұрыс деп санайтындардың да ең жоғары үлесі жоғары білімді азаматтар арасында тіркеледі (86 пайыз)", - делінген хабарламада.

Зерттеу авторлары Президентке сенім мен ел бағытын бағалауда ерлер мен әйелдер, сондай-ақ қала мен ауыл тұрғындарының көзқарастары арасында айтарлықтай айырмашылық анықталмағанын атап өтті.

"Зерттеу нәтижелері елдің әлеуметтік-саяси даму бағытын барынша оң бағалайтын азаматтардың әлеуметтік санатын анықтауға мүмкіндік берді. Олар мемлекеттік бастамаларды одан әрі ілгерілетудің әлеуетті тірегі бола алады. Бұл санатты жас қазақстандықтар мен жоғары білімді азаматтар құрайды", - деп атап өтті зерттеу авторлары.

Сондай-ақ зерттеушілер Президентке сенімнің жоғары деңгейі мен Қазақстанның даму бағытының оң бағалануы қоғамның жоғары шоғырлануын, әлеуметтік оптимизм мен тұрақты қоғамдық-саяси тұрақтылықты айғақтайды деп санайды.

Еске сала кетейік, бұған дейін Президентке сенімнің жоғары деңгейін Қазақстандық қоғамдық даму институты (ҚҚДИ) да тіркеді. 2024 жылдың ІІ тоқсанында бұл көрсеткіш 86,9 пайыз болған.

Google News арқылы жаңалықтарымызды қадағалаңыз