Әлеуметтік төлемдер мен құрылыс сапасын бақылау: Бектенов министрлер мен әкімдерге тапсырма берді

Қазақстанда әлеуметтік қолдау жүйесіне өзгерістер енгізу, балаларға арналған есту аппараттарын өндіруді жолға қою және құрылыс пен жол сапасына бақылауды күшейту жоспарланып отыр.

Бұл мәселелер премьер-министр Олжас Бектеновтің төрағалығымен өткен жиында қаралды.

Әлеуметтік төлемдер 

Еңбек және халықты әлеуметтік қорғау министрлігі әлеуметтік көмекті мұқтаждыққа қарай бағыттау жүйесін әзірлеуде. 36 төлем түрінің 14-і бойынша жаңа нормативтік база жасалып жатыр. 2027 жылдан бастап ардагерлерге көрсетілетін қолдау да мұқтаждыққа қарай есептелмек.

Отбасыларға қолдау

Әкелерге бала күтімі бойынша демалыс беру мүмкіндігі қарастырылды. Әйелдерге екі жылдық қолдау аясында балабақша мен күтушілер тапшылығын шешу жолдары талқыланды.

Есту аппараттары өндірісі 

Денсаулық сақтау, өнеркәсіп және құрылыс министрліктеріне балаларға арналған есту аппараттарын шығару бойынша жол картасын әзірлеу тапсырылды. Қазіргі таңда 6 мыңнан астам бала диспансерлік есепте тұр.

Медицина қаржыландыруы

2026 жылы тегін медициналық көмекке — 1,6 трлн теңге, міндетті әлеуметтік медициналық сақтандыруға — 1,7 трлн теңге бөлінеді.

Білім және экология

1,4 млн бастауыш сынып оқушысы мектепте тегін тамақпен қамтылған. «Жасыл мектеп» жобасы мың мектепке дейін кеңейтіледі. Экологиялық стандарт бес бағытты қамтиды: ағарту, волонтерлік, тазалық, көгалдандыру және табиғи аумақтарды қорғау.

Қоғамдық тәртіп 

Ішкі істер министрлігі граффити салуға толық тыйым енгізуді ұсынды. Сонымен қатар 80 мыңнан астам наркограффити жойылды, 81 қылмыстық іс қозғалды.

Құрылыс және жолдар

Құрылыс сапасына бақылау күшейтіледі, адал емес мердігерлерге қатаң шара қолданылмақ. Жолдардың 94%-ы республикалық деңгейде талапқа сай, бірақ тұрғындардан түскен шағымдардың басым бөлігі жергілікті жолдарға қатысты.

Үкімет тапсырмаларының орындалуын бірінші вице-премьер Нұрлыбек Нәлібаев үйлестіретін болады.

Кеше, 14:14