Әлиев Қазақстан мен Әзербайжанның мәдени күндерін жиі өткізуді ұсынды

АСТАНА, 21 қазан – Sputnik. Әзербайжан президенті Ильхам Әлиев екі елдің мәдени күндерін жиі өткізуді ұсынды, деп хабарлайды Sputnik Қазақстан.

Бүгін Ақордада Қазақстан мен Әзербайжан президенттері келіссөздер ғана емес, Жоғары мемлекетаралық кеңестің екінші отырысын да өткізді. Сол кезде Ильхам Әлиев Қазақстан мен Әзербайжанның мәдени күндерін жиі өткізуді ұсынды.

"Былтыр және алдыңғы жылы Қазақстанда Әзербайжанның мәдени күндері, ал Әзербайжанда Қазақстанның мәдени күндері ұйымдастырылған болатын. Меніңше, мұндай шараларды тұрақты және жиі өткізу керек. Бәлкім, екі елдің мәдени қарым-қатынасы бойынша жол картасын әзірлеу керек. Соның аясында мәдени күндерді екі елдің астанасында да, басқа аймақтарда да жиі өткізуге болады", - деді Әлиев.

Бүгінгі келіссөздер кезінде екі елдің президенті мәдени ынтымақтастық бағдарламасын қабылдауға уағдаласты.

Айта кетері, Ильхам Әлиев Қазақстанға мемлекеттік сапармен кеше келген. Тоқаев мәртебелі мейманды Астана әуежайынан өзі күтіп алды. Бүгін Әзербайжан президентін Ақордада салтанатты түрде қарсы алды.