Алматы халықаралық Turkic Game Jam 2026 хакатонының алаңына айналды

Алматыда жас әзірлеушілерді, дизайнерлерді және ойын индустриясының мамандарын біріктірген халықаралық Turkic Game Jam 2026 хакатонының жергілікті кезеңі аяқталды, – деп хабарлайды Aikyn.kz.

Қатысушылар 48 сағат бойы түркі халықтарының мифтері, аңыздары мен мәдени мұрасынан шабыт алған ойын жобаларын әзірледі.

2026 жылы хакатон бір мезгілде алты елде ұйымдастырылып, түркі мемлекеттерінің GameDev қауымдастықтары арасындағы ынтымақтастықты дамытуға бағытталған ең ірі бастамалардың біріне айналды. Алматыда жобалардың финалдық қорғалуына 12 команда қатысып, сарапшылар алқасының назарына өз ойын әзірлемелерін ұсынды.

Байқау қорытындысы бойынша жергілікті кезеңнің жеңімпазы Teqes Studio командасы атанды. Енді олар қыркүйек айында Будапешт қаласында өтетін халықаралық гранд-финалда Алматының намысын қорғап, қатысушы елдердің үздік командаларымен бақ сынайды.

«Turkic Game Jam хакатонының ұйымдастырушыларының бірі ретінде бұл бастаманың қайтадан Алматыда өтуі және жергілікті GameDev қауымдастығының қарқынды дамып келе жатқанын көру – біз үшін үлкен мақтаныш. Биыл біз заманауи цифрлық технологиялар мен түркі халықтарының бай мәдени мұрасының үйлесім тапқанын көрдік. Осы 48 сағаттың нәтижесі біздің күткенімізден де асып түсті», – деді Almaty Tourism Bureau директорының орынбасары Бақыт Елубаева.

Turkic Game Jam креативті индустрияларды дамытуға, жас таланттарды қолдауға және цифрлық технология саласындағы халықаралық ынтымақтастықты нығайтуға ықпал етеді. Мұндай бастамалар жас мамандардың кәсіби дамуына қосымша мүмкіндік беріп, Алматыдағы креативті индустрия экожүйесінің одан әрі дамуына серпін береді.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.