Алматы мен Астана әлемнің үздік 300 қаласының қатарына енді

Қазақстанның екі бірдей мегаполисі Oxford Economics әзірлейтін Global Cities Index 2026 топ-300 қатарына кірді. Әлемнің 1000 қаласы ішінде Алматы 265-орынға, ал Астана 281-орынға тұрақтады. Әсіресе, адами капитал көрсеткіші бойынша қазақстандық мегаполистердің позициясы жоғары болды, деп хабарлайды Tengrinews.kz.

Алматы мен Астана рейтингтің алғашқы үштен бірінде

Қазақстандық мегаполистер Орталық Азия қалалары арасында көш бастап, бұрынғы кеңестік кеңістіктегі көптеген ірі қаладан озып кетті. Атап айтқанда, Тбилиси 287-орынға, Киев - 304, Мәскеу - 313, Баку - 323, Санкт-Петербург - 454, ал Бішкек 461-орынға жайғасты.

Осылайша, Қазақстанның қос мегаполисі де 1000 қала ішінде рейтингтің алғашқы үштен бір бөлігіне кірді.

Алматы мен Астана адами капитал бойынша топ-100 қатарына кірді

Алматы мен Астана адами капитал көрсеткіші бойынша айтарлықтай жоғары нәтиже көрсетті. Алматы әлем бойынша 66-орынға, ал Астана 98-орынға ие болып, Анкара, Варшава, Прага, Таллин, Мәскеу сияқты көптеген әлем астанасын артқа тастады.

Oxford Economics адами капиталды бағалау кезінде қаланың кадрлық әлеуетінің ауқымы мен сапасын, дағдылар мен білім деңгейін, еңбек нарығының жай-күйін, сондай-ақ білікті мамандарды тарту, дамыту және ұстап қалу қабілетін ескереді.

Бұл ретте экономикалық көрсеткіш бойынша Астана Алматыдан жоғары орналасты: елорда 264-орынды, ал Алматы 288-орынды иеленді.

Oxford Economics тағы нені ескерді?

Экономика мен адами капиталдан бөлек, Oxford Economics өмір сүру сапасын, қоршаған орта жай-күйін және басқару жүйесін ескереді. Бес көрсеткіштің әрқайсысы бөлек бағаланып, соның нәтижесінде қаланың жалпы рейтингі қалыптасады.

Oxford Economics бұл индексті әлемнің ірі қалаларының мықты және әлсіз тұстарын салыстыру құралы деп атайды. Зерттеуде экономикалық болжамдар мен стандартталған сапалы деректер пайдаланылады, сондықтан рейтинг қалалардың қазіргі жағдайын ғана емес, олардың болашақ даму мүмкіндіктерін де қамтиды.

Нью-Йорк, Лондон және Париж тағы көш басында

Global Cities Index 2026 алғашқы үштігіне Нью-Йорк, Лондон және Париж кірді. Олар былтырғы позицияларын сақтап қалды.

Рейтингке барлығы 1000 қала кірді. Oxford Economics жоғарғы сатыларды әлі де Еуропа мен Солтүстік Америка қалалары иеленіп отырғанын атап өтті: алғашқы жүздіктің 78-і осы екі аймаққа тиесілі.

Бізді Google-дың негізгі дереккөздер тізіміне қосыңыз

Қосу