Алматы облысында су құбырының құрылысы тоқтап қалды

Талғарда 4 жыл бұрын басталған магистралды су құбырының құрылысы былтыр желтоқсанда тоқтап қалды.

Себебі жобаны жүзеге асыруға қажетті 4,6 млрд теңге толық бөлінбеген. Қазір қысымның төмендігінен көпқабатты үйлерге су көтерілмейді. Әсіресе жазда тұрғындар тіршілік нәрін сырттан тасып ішуге мәжбүр. Құрылысты аяқтау үшін әлі 1,7 млрд теңге қажет. Соның 600 млн теңгесі облыстық бюджеттен бөлінеді. Сыйымдылығы 7600 текше метрлік 4 резервуар салынса, шамамен 40 мың тұрғын ауызсу тапшылығынан арылады - дейді мамандар. «Маңызды нысанды халық игілігіне тезірек тапсыру үшін қосымша қаржы көзін қарастыру керек», - деді өңірге жұмыс сапарымен барған Мәжіліс депутататтары.

Данияр Қасқарауов, ҚР Парламенті Мәжілісінің депутаты:

- Өздеріңіз білесіздер, Парламентте 3 жылға қаражат бекітілді. Қазір мен қалған қаражатты қайдан алу керектігі жөнінде сұрап жатырмын, бірақ ешкім әзірге жауабын білмейді. Алматы облысында халықпен кездесу жүргізіп, басқа да мәселелердің бәрін толық білгеннен кейін міндетті түрде әкімімен кездесіп, ұзаққа созбай, шешімін табу жолын табамыз.