Сәтпаев даңғылының реконструкциясы неліктен тоқтап қалды

Көп миллиардтық жобаны қайта қарауға жібергендіктен, 2026 жылғы құрылыс маусымы толықтай өткізіліп алуы мүмкін.

Қаланың басты көлік артериясын қайта құру жұмыстары өткен жылдың көктемінде басталған. Жобаның құны – 20,3 млрд теңге (ҚҚС-пен). Бас мердігер «Атырауинжстрой-АИС» ЖШС жол жамылғысын ауыстырып, айнала аумақты абаттандыруға міндеттелді. Бұған қоса, жобаға Студенттер көшесі мен Байтұрсынов көшесін қайта құру да енгізілген.

Атырау тұрғындары бірнеше ай бойы кептелісте шыдамдылықпен жүрді, алайда даңғыл көлік қозғалысына ашылғанда уәде етілген ауқымды өзгерістерді ешкім байқамады.

Кейін билік түсіндіргендей, Сәтпаев даңғылында тек орташа жөндеу жүргізілген, себебі асфальт жамылғысы жарамды деп танылған. Ал абаттандыруға қатысты барлық жұмыстар (балалар және спорт алаңдары, серуендеу аймақтары, тыныш демалыс орындары, көлеңке аркалары, шағын сәулет нысандары, түрлі жарықтандыру түрлері, веложолдар, жаңа аялдама павильондары, субұрқақтар және т.б.) 2026 жылға қалдырылды.

Жақында жаңа облыс әкімі жұмысты дереу жалғастыруды тапсырды, бірақ іс жүзінде мәселе әлдеқайда күрделі болып шықты.

Атырау қаласы әкімдігінің мәліметінше, жобаны жүзеге асыру келісімшарттық міндеттемелерді ұзарту қажеттілігіне, порталға тіркеу кезінде туындаған техникалық ақауларға және көптеген инженерлік коммуникациялар бойынша техникалық шарттарды келісуге байланысты тоқтатылған. Бұдан бөлек, есепке алынбаған жұмыстарға байланысты жобаны қолданыстағы смета шеңберінде түзету жоспарланып отыр.

Сәтпаев даңғылындағы ауқымды реконструкция жұмыстары тек түзетілген жоба мемлекеттік сараптамадан оң қорытынды алғаннан кейін ғана жалғасады. Бұл рәсімдер уақытты талап ететіндіктен, 2026 жылғы құрылыс маусымы толықтай өткізіліп алуы ықтимал.

Ал әзірге жақын арада Студенттер көшесі мен Байтурсынов көшесін асфальттау жоспарланған, бірақ бұл жұмыс өткен жылдың қыркүйегінде уәде етілген еді.

Лев ГУЗИКОВ

24 тамыз, 16:20