Алматы облысында жүк көлігі жеке тұрғын үйге соғылды

Соққының күші қатты болғаны соншалық – көліктің кабинасы мыжылып, жүргізушінің аяғы жаншылған темірдің арасында қысылып қалған. Оқиға орнына ҚР ТЖМ «Барыс» республикалық жедел-құтқару жасағының мамандары дереу жетті.

Ведомствоның мәліметінше, құтқарушылар жүргізушіні босату үшін Holmatro кәсіби гидравликалық құралын қолданылды. Мамандардың айтуынша, операция аса мұқият жүргізілген, өйткені зардап шеккен ер адам қосымша жарақат алуы мүмкін еді.

1986 жылы туған азамат көліктен шығарылып, ауруханаға жеткізу үшін жедел жәрдем бригадасына тапсырылды.

Төтенше жағдайлар министрлігі жүргізушілерді жылдамдық режимін қатаң сақтауға және жолдарда, әсіресе елді мекендер ішінде барынша мұқият болуға үндеді.

Еске салайық, бұған дейін Петропавлда екі көлік жеке тұрғын үйге соқтығысқанын хабарлағанбыз.