Алматы облысындағы ажалды ЖКО: қызметтік көлік тізгінінде кім отырды?

Алматы облысында адам өлімімен аяқталған жол апатынан кейін тек ЖКО емес, жүргізушіні ауыстыру ықтималдығы да тергеле бастады, деп хабарлайды Tengrinews.kz Almaty.tv арнасына сілтеме жасап.

Тамызда Алматы - Қорғас тасжолында қызметтік көлік белгіленбеген жерден жолды кесіп өтпек болған зейнеткерді қағып кеткен. Әйел алған жарақаттарынан көз жұмды. Соқтығысқаннан кейін көлік оқиға орнынан кетіп қалған.

Іс материалдарына сәйкес, рөлде ХҚКО-ның 26 жастағы қызметкері болған. Ол ұсталып, қамауға алынды. Алайда күдіктінің туыстары апат кезінде көлікті ол емес, оның басшысы басқарғанын айтып отыр. Басшысы жас қызметкерден оны Алматыға апарып тастауды өтініп, кейін жауапкершілікті өз мойнына алуды ұсынған көрінеді.

"Алғашқы жауап алу кезінде ол рөлде болғанын айтқан. Бірақ бірнеше күн өткеннен кейін кездесуге әрең рұқсат алған кезімде, ол маған рульде өзі емес, ХҚКО басшылығы болғанын мойындады. Мен осы апатты көрген-білгендерден, бәлкім біреуде бейнежазба бар шығар, рульде нақты кім болғанын көрсетуді сұраймын. Менің ұлым бастығы не айтса соны істейтін өте сенгіш бала", - деді күдіктінің анасы Саламат Азаматова.

"Өз айғақтарында ол апат кезінде шынымен де қасында болғанын мәлімдеді. Сонымен қатар, оның айтуынша, оқиға орнынан кетуге дәл осы бастығы бұйрық берген. Тергеу қылмыстық істің барлық мән-жайын жан-жақты, толық және объективті зерттеуге міндетті. Сондықтан қазір сұрау салу жіберіп, барлық бейнебақылау камераларын тексеру қажет. Камералар арқылы көліктің сол күнгі бүкіл бағытын анықтау керек", - деп атап өтті адвокат Ғабит Өмірбек.

Қазір туыстары шындықты білуге тырысып жатыр. Олардың айтуынша, көлікте бейнетіркегіш болмаған. Тағы бір маңызды деталь - куәгердің түсініктемесі. Ол көлік тоқтағаннан кейін оның ішінен бір емес, бірнеше адам шыққанын алға тартады.

"Көлік қағып кетіп, 80 метрдей жүріп барып тоқтады. Меніңше, қателеспесем, үш есік ашылды. Бірақ бұл нақты емес, 100 пайыз айта алмаймын. Ол жерден екі-үш ер адам шықты", - деді апат куәгері.

ХҚКО-ның өзі бұл нұсқаны жоққа шығарып отыр. Ондағылардың мәлімдеуінше, жас қызметкер қызметтік көлікті рұқсатсыз мінген. Оның үстіне, сол күні көлік жөндеуде болған. Оқиғадан кейін мекеме басшылығы тәртіптік жауапкершілікке тартылды.

Ал 26 жастағы күдікті Талдықорғандағы тергеу изоляторында қамауда отыр. Жол-көлік оқиғасының барлық мән-жайы мен себептерін анықтауға бағытталған кешенді тергеу амалдары жүргізіліп жатыр.

ҚАЗІР ТАЛҚЫЛАНЫП ЖАТЫР

Астана-1 вокзалын жөндеу: қашан аяқталады және қазіргі жағдайы қандай?

05 қыркүйек 14:58 1

Әзірге басты сұрақ ашық қалып отыр: рөлде шынымен ХҚКО қызметкері болды ма, әлде тергеу қайғылы сапардың басқа қатысушысын анықтай ма? Бұл сұрақтың жауабын сараптамалар, камера жазбалары, куәгерлердің айғақтары және қылмыстық істің басқа да материалдары беруі тиіс. Егер күдіктінің кінәсі дәлелденсе, ол төрт жылдан алты жылға дейін бас бостандығынан айырылуы мүмкін.

Google News арқылы жаңалықтарымызды қадағалаңыз