Алматы орталығындағы “Құпия жоба“: Назарбаев даңғылындағы нысанның эскиздері пайда болды

Екі жылдан астам уақыт бойы Назарбаев даңғылы мен Сәтбаев көшесінің қиылысында биік әрі тұйық қоршау тұрды. Алматылықтар қоршаудың арғы жағында не түрғызылатынын болжап, бұл жер телімінің тағдыры қашан белгілі болатынын күтті. Мұнда жаңа ауқымды жоба іске асырылады деп жоспарланған, бірақ ұзақ уақыт бойы ешқандай мәлімет берілмеді. Tengrinews.kz тілшілері қазіргі уақытта құрылыс қай кезеңде екенін, нысанды қашан аяқтау жоспарланғанын және Алматы орталығындағы жаңа қоғамдық кеңістік қандай болатынын анықтады.

Ірі жоба

Мұнда келушілерге арналған апарт-қонақүйі бар кітапхана салынып жатқаны белгілі болды. Нысан Назарбаев даңғылынан шығысқа қарай және Сәтбаев көшесінен оңтүстікке қарай орналасқан. Жобаны іске асыруға "Qazaq Stroy" ЖШС жауапты.

Құрылыс екі кезеңге есептелген. Бірінші кезеңдегі ғимараттардың ауданы 16 968 шаршы метр, екіншісі - 92 737,34 шаршы метр болады.

Компания өкілдері алғашқы эскиздік жоба 2024 жылдың қыркүйегінде мақұлданғанын, алайда бір жылдан кейін ол қайта қаралып, қайта мақұлданғанын атап өтті. "Qazaq Stroy" мәліметінше, өзгерістер ғимараттың пішініне, қасбет тұжырымдамасына және жоспарлау шешімдеріне қатысты болды.

Кітапхана, апарт-қонақүй және шығармашылық кеңістік

"Qazaq Stroy" мәліметінше, жобаның түпкілікті нұсқасында кітап оқып, жұмыс істеуге, дәріс тыңдауға, конференцияларға қатысуға, шығармашылықпен айналысуға және балалармен уақыт өткізуге болатын үлкен қоғамдық кеңістік қарастырылған.

Алматыдағы "Апарт-қонақүйі бар кітапхана" жобасының эскизі. Суретті "Qazaq Stroy" ұсынды

Мәселен, кітапханада жалпы сыйымдылығы 400 адамға дейінгі оқу залдары болады. Өз бетінше жұмыс істегенді жөн көретіндер үшін жеке жұмыс орындары мен тыныш аймақ қарастырылады. Сондай-ақ жаңа әдебиеттер, мерзімді басылымдар, еркін оқу аймақтары, балалар мен жасөспірімдерге арналған орындар болады.

"Кітапхана қоры 500 мың сақтау бірлігіне есептелген", - деп нақтылады компания.

Бұл ретте 75 мың кітап ашық қолжетімділікте, ал тағы 425 мыңы кітап қоймаларында орналастырылады.

"Сондай-ақ жобада заманауи цифрлық кітапхана технологияларын қолдану қарастырылған, оның ішінде өзіне-өзі қызмет көрсету орындары, басылымдарды қайтару мен сұрыптаудың автоматтандырылған жүйесі, сондай-ақ кітапхана қорын өңдеу мен цифрландыруға арналған автоматтандырылған жабдықтар бар", - деп бөлісті құрылыс салушы.

Алматыдағы "Апарт-қонақүйі бар кітапхана" жобасының эскизі. Суретті "Qazaq Stroy" ұсынды

Дәрістер, кездесулер мен ірі іс-шаралар үшін жобада бірден бірнеше зал қарастырылған: 191 адамға арналған өнер көрсету залы, 320 адамға арналған дәріс залы және 195 адамға арналған конференц-зал.

Үшінші қабатта 28 орындық коворкинг пайда болады - онда білім алуға, жобалармен жұмыс істеуге, кездесулер өткізуге және зерттеу жұмыстарымен айналысуға болады.

Сонымен қатар мұнда сурет салуға, мүсіндеуге, модельдеуге және сәндік-қолданбалы өнермен айналысуға болатын шығармашылық шеберханалар қарастырылған. Жекелеген үй-жайлар 3D-басып шығару және лазерлік кесу сабақтары үшін жабдықталады.

Алматыдағы "Апарт-қонақүйі бар кітапхана" жобасының эскизі. Суретті "Qazaq Stroy" ұсынды

Сондай-ақ жобада дыбыс жазу студиялары қарастырылған. Онда подкастар, вокал және музыка жазу жоспарланған.

Балалар мен жасөспірімдер үшін құрылыс салушы жеке кеңістіктер жасауға, ал аулада балаларға арналған және жалпы демалыс алаңдарын жабдықтауға уәде береді.

Бұдан бөлек, кешенде кітап және кәдесый дүкендері, 60 орындық кофейня және 50 орындық кафе болады.

"Кешен ішінде бір мезгілде 1 400-ге дейін келуші бола алады", - деп хабарлады компания өкілдері.

Сонымен қатар жоба бойынша іргелес аумақты кешенді абаттандыру қарастырылған. Мұнда өсімдіктер отырғызу, демалыс орындарын жабдықтау және шағын сәулет нысандарын орнату жоспарланған. Сондай-ақ жаяу жүргінші жолдары, көлік жолдары, тұрақ және шаруашылық аймағы пайда болады.

Құрылыс салушының мәліметінше, ғимараттың айналасында айналма тротуар алаңы жасалады. Ол жаяу жүргіншілердің ыңғайлы қозғалысын қамтамасыз етіп, барлық кіреберіске автокөліктер мен арнайы техниканың, соның ішінде өрт сөндіру машиналарының келу мүмкіндігі болуы тиіс.

Жобаны кім әзірледі және оның құны қанша?

Құрылыс салушының мәліметінше, сәулеттік тұжырымдама мен жобалық құжаттаманың авторы қазақстандық "INK Architects" сәулет бюросы.

Қазақстан Сыртқы істер министрлігінің Инвестициялар комитетімен жасалған келісімшартқа сәйкес, жобаның материалдық емес активтеріне салынған инвестиция көлемі 26,199 миллиард теңге.

Бұл ретте құрылыс салушы мынаны атап өтті: құрылыс компанияның өз қаражаты есебінен жүргізіліп жатыр. Жобаға республикалық немесе қалалық бюджеттен қаражат жұмсалмайды.

Құрылысты қашан аяқтау жоспарланған?

Qazaq Stroy компаниясы қазіргі уақытта нысанда құрылыс-монтаж жұмыстарының айтарлықтай көлемі орындалғанын хабарлады.

"Ғимараттың негізгі конструкциялары аяқталды. Сонымен қатар инженерлік жүйелер мен желілерді тарту, ішкі әрлеу, қасбетті жабдықтау, витражды конструкцияларды монтаждау және сыртқы инженерлік желілерді орнату жұмыстары қатар жүргізіліп жатыр", - деп нақтылады құрылыс салушы.

Инвестициялық келісімшартқа сәйкес, жоба 2027 жылғы 30 қыркүйекке дейін іске асырылуы тиіс.

Естеріңізге сала кетейік, бұған дейін Алматыдағы Гоголь мен Байтұрсынов көшелері қиылысындағы ескі трамвай депосының орнына не салынатыны белгілі болған еді. Әкімдік мәліметінше, мұнда ауданы шамамен 32 мың шаршы метр болатын креативті кластердің құрылысы басталып кетті. Оның құрамына көпфункционалды концерт залы, іс-шараларға арналған қоғамдық кеңістіктер, креативті индустрия өкілдеріне арналған студиялар мен шеберханалар, қазақстандық дизайнерлердің шоурумдары, заманауи өнер галереясы, қалалық шараларға арналған атриум, сондай-ақ кәсіпкерлерге арналған кеңселер кіреді.

Google News арқылы жаңалықтарымызды қадағалаңыз

Жазылу