Алматыда Наурызбай батыр көшесінде оқшауланған веложолақ пайда болады

Алматыда Наурызбай батыр көшесіндегі қозғалыс сызбасы өзгереді. 1 тамыздан бастап Райымбек даңғылынан Абай даңғылына дейінгі учаскеде оқшауланған веложолақ пайда болады, деп хабарлайды Tengri Auto.

Қалалық мобильділік басқармасы мәліметінше, бұл үшін көшедегі қоғамдық көлікке арналған арнайы жолақ алынып тасталады. Автобус бағыттары Желтоқсан көшесіне ауыстырылады.

Ведомство бұл өзгерістер қауіпсіз велосипед инфрақұрылымын жасауға, сондай-ақ көлік ағынын оңтайландыруға мүмкіндік беретінін түсіндірді.

Жүргізушілер мен жол қозғалысының өзге де қатысушыларынан бағытты жоспарлау кезінде өзгерістерді алдын ала ескеруді және жол белгілері мен таңбаларына назар аударуды сұрайды.

Айта кетейік, көшедегі қазіргі таңбалар осыдан бір апта бұрын өшірілген, бірақ жаңасы әзірге салынбады.

Еске сала кетейік, жыл соңына дейін веложолдар ұзындығын 87 шақырымнан 125,5 шақырымға дейін ұлғайту жоспарланған.

Басқарма мәліметінше, жаңа веложолақтар Сәтпаев, Масанчи, Жароков, Жандосов, Жамбыл, Қарасай батыр, Қазыбек би көшелерінде, сондай-ақ Назарбаев пен Абылай хан даңғылдарында пайда болуы мүмкін.

Тағы оқыңыз: 25 тамыздан бастап жеке электрсамокат иелері үшін не өзгереді?

Google News арқылы жаңалықтарымызды қадағалаңыз